ཡབ་ལ་རེ་བ་རུམ་གང་ཡོད། །
ཡུམ་ལ་རྨི་ལམ་པང་གང་ཡོད། །
གཉིས་ཀར་བརྩེ་བ་ཁྱིམ་གང་ཡོད། །
འབྲོག་ཁྱིམ་སྟོང་གི་བསྡུས་གཟུགས་རེད། །
ལྷ་ལ་ལུང་བསྟན་རྫོགས་མེད་ཡོད། །
མི་ལ་འདོད་པ་ངོམས་མེད་ཡོད། །
ལྷ་མི་སྦྲེལ་བའི་རྨུ་ཐག་དེ། །
རྟེན་འབྲེལ་སྟོང་གི་བསྡུས་གཟུགས་རེད། །
ཁོག་ལ་ཉར་ན་བདེ་སྣང་སྐྱེས། །
ལྟེ་ཁྲག་འཐོར་ན་སྡོང་བོ་སྐྱེས། །
བྱིས་པ་ཕལ་ལས་ལྷག་པ་འདི། །
བོད་ཕྲུག་སྟོང་གི་བསྡུས་གཟུགས་རེད། །
བྱ་ཁྱུང་བྲག་ན་བླ་མ་བཞུགས། །
དེ་ལ་འབྲེལ་བའི་ལས་ཤིག་བདོག །
དགེ་རྒན་དགེ་ཕྲུག་ཆགས་པ་དེ། །
བན་ཆུང་སྟོང་གི་བསྡུས་གཟུགས་རེད། །

དཔེ་ཆ་འདོན་ཞོར་རྩེད་མོ་བརྩེས། །
སྐབས་རེར་རྒན་གྱི་བཀའ་བཀྱོན་རག །
བྱ་བྱེའུ་འབའ་འབུ་མི་གསོད་པ། །
བྱང་སེམས་སྟོང་གི་བསྡུས་གཟུགས་རེད། །
གོམ་ཁ་དབུས་གཙང་ཡུལ་དུ་བསྒྱུར། །
སྐྱེས་ལྷ་དག་གིས་སྐྱེལ་མ་བྱས། །
ཕྱི་མིག་ཕ་སར་བཞག་པ་དེ། །
བྱེས་འགྲོ་སྟོང་གི་བསྡུས་གཟུགས་རེད། །
བཤེས་གཉེན་བརྒྱ་ཕྲག་བསྟེན་པ་དང་། །
ཉིན་མཚན་སློབ་གཉེར་བྱས་པ་དང་། །
དཀའ་སྤྱད་སྙིང་རུས་ཆེ་བ་དེ། །
གྲྭ་རྐྱང་སྟོང་གི་བསྡུས་གཟུགས་རེད། །
བཤེས་གཉེན་བསྟེན་ཚུལ་བཟང་བ་དང་། །
འདུལ་བའི་ལག་ལེན་གཙང་བ་དང་། །
འཆད་རྩོད་རྩོམ་ལ་མཁས་པ་འདི། །
བཙུན་པ་སྟོང་གི་བསྡུས་གཟུགས་རེད། །
སྟོན་ཆེན་སྟོང་གི་བསྡུས་གཟུགས་རེད། །
རིས་མེད་གྲྭ་ས་འགྲིམས་པ་དང་། །
རིས་མེད་བླ་མ་བསྟེན་པ་དང་། །
རིས་མེད་གཞུང་ལ་སྦྱངས་པ་འདི། །
སྟོན་ཆེན་སྟོང་གི་བསྡུས་གཟུགས་རེད། །
སྡོད་དུས་འཛིན་ཆས་ཉུང་བ་དང་། །
འགྲོ་དུས་ཁུར་པོ་ཡང་བ་དང་། །
ཕྱོགས་མེད་རྒྱལ་ཁམས་འགྲིམས་པ་འདི། །
བྱ་བྲལ་སྟོང་གི་བསྡུས་གཟུགས་རེད། །
དབང་སྐུར་མང་པོ་ཞུས་པ་དང་། །
དམ་ཚིག་སྲོག་གིས་སྲུང་བ་དང་། །
བསྐྱེད་རྫོགས་ཉམས་རྟོགས་འབར་བ་འདི། །
རྣལ་འབྱོར་སྟོང་གི་བསྡུས་གཟུགས་རེད། །
རྡོ་ཡི་མཎཌལ་འབུལ་བ་དང་། །
ཕྱག་ལ་སེར་ཁ་གས་པ་དང་། །
ཕྱག་ངར་ཁྲག་གིས་སྦགས་པ་འདི། །
དཀའ་ཐུབ་སྟོང་གི་བསྡུས་གཟུགས་ཡིན། །
འདུལ་བས་སྔགས་ལ་མི་གནོད་ཅིང་། །
སྔགས་ཀྱིས་འདུལ་བ་མི་སྤོང་བར། །
གཅིག་གྲོགས་གཅིག་ཏུ་ཤར་བ་འདི། །
བསྟན་འཛིན་སྟོང་གི་བསྡུས་གཟུགས་རེད། །
འཆད་ན་སྤྲིན་བཞིན་འཕྱུར་བ་དང་། །
རྩོད་ན་གློག་བཞིན་འཁྱུག་པ་དང་། །
རྩོམ་ན་ཆར་བཞིན་འབབ་པ་འདི། །
མཁས་པ་སྟོང་གི་བསྡུས་གཟུགས་རེད། །



ཡི་དམ་ལྷ་ཞལ་གཟིགས་པ་དང་། །
མཁའ་འགྲོའི་ལུང་བསྟན་ཐོབ་པ་དང་། །
ཆོས་སྐྱོང་བྲན་དུ་ཁོལ་བ་འདི། །
གྲུབ་ཐོབ་སྟོང་གི་བསྡུས་གཟུགས་རེད། །
བོད་ཡུལ་གྲྭ་པས་བཀང་བ་དང་། ། 
གྲྭ་ས་ཆོས་སྒྲས་ཁེངས་པ་དང་། །
ཆོས་སྒྲས་ཆོས་མིན་ཕམ་པ་འདི། །
ཆོས་པ་སྟོང་གི་བསྡུས་གཟུགས་རེད། །
བོད་ཡུལ་གནའ་ནས་བསྐྱུར་པ་དང་། །
ས་མཐར་བྲེལ་འཚབ་ཆེ་བ་དང་། །
དགའ་ལྡན་ལྔ་མཆོད་བསླེབས་པ་ཡིས། །
འདི་ཙམ་ཁྱེད་ལ་འབུལ་བ་ལགས། །