འཛིན་གྲྭ་ཚུགས་ནས་སྐར་མ་ལྔའི་རྗེས་སུ་དགེ་རྒན་སུང་འཛིན་ཁང་དུ་བསླེབས་ཤིང་། མོའི་གདོང་ལ་ནམ་རྒྱུན་དང་མི་འདྲ་བའི་དོགས་པ་དང་འཇིགས་སྐྲག་གི་མདངས་ཤིག་ཤར་འདུག མོས་རྩོམ་རིག་སློབ་ཁྲིད་བྱེད་དུས་སྐད་གདངས་འདར་བ་དང་ནག་པང་སྟེང་ཡི་གེ་འབྲི་དུས་ལག་པ་འདར་བའི་ཚུགས་ཀ་དེ་མཐོང་ནས་སློབ་གྲོགས་རེ་ཟུང་གིས་ལྐོག་ཏུ་གད་མོ་དགོད་པ་དང་སྐད་ཤུགས་ཆུང་ངུས་ཅི་ཞིག་རྗོད་བཞིན་ཡོད་པ་ཐོས་ཐུབ་ཀྱང་། དགེ་རྒན་སུང་ལ་མཚོན་ན་ནམ་རྒྱུན་དང་མི་འདྲ་བར་དེ་ཚོ་སྣང་མེད་དུ་བཞག་སྟེ་མུ་མཐུད་སློབ་ཁྲིད་བྱེད་བཞིན་འདུག དོ་སྣང་མི་བྱེད་ཐབས་མེད་གཅིག་ནི་ང་དང་ཅོག་ཙེ་གཅིག་གི་སྟེང་དུ་ལོ་གཅིག་ཙམ་བསྡད་པའི་རྒྱ་རིགས་སློབ་གྲོགས་ཝང་ཟེར་བའི་ཕོ་གསར་འདིས་དེ་རིང་ང་ལ་ཚུར་སྐད་ཆ་ཚིག་གཅིག་ཀྱང་མི་བཤད་པ་དང་། ཕར་སྐད་ཆ་རེ་བཤད་ཀྱང་ནམ་རྒྱུན་དང་ཡེ་ནས་མི་འདྲ་བར་གདོང་ལ་སུན་སྣང་དང་མཐོང་ཆུང་གི་རྣམ་འགྱུར་ཞིག་རེས་མངོན་རེས་ཡིབ་ཀྱི་ཚུལ་དུ་སྣང་ཞིང་། ”དཀར་ནག་གོ་ལྡོག་”དང་”འཆི་ལམ་དུ་འདེད་པ་”ཞེས་པའི་དེབ་གཉིས་པོ་དེ་ཚུར་སྤྲད་དེ། ཁྱེད་ཀྱི་དེབ་གཉིས་འདིར་ཡོད། ཅེས་པ་ཙམ་ལས་གཞན་པའི་འགྲེལ་བཤད་ཚིག་གཅིག་ཀྱང་མི་རྒྱག་པ་དེ་རེད། ང་ཚོའི་འཛིན་གྲྭ་འདིའི་ནང་བོད་རིགས་སློབ་ཕྲུག་ང་དང་ཨ་མདོ་ནས་ཡོང་བའི་ཟླ་བ་གཉིས་ལས་མེད་ཅིང་། དེ་རིང་ཟླ་བ་ཡང་ནམ་རྒྱུན་གྱི་མི་རྩེད་དགོད་ཅན་དེ་མ་ཡིན་པར་གདོང་པ་གློད་ཅིང་མིག་གིས་དེབ་ངོས་སུ་མ་གཏོགས་གཡས་གཡོན་དུ་ལྟ་ཙམ་ཡང་མི་བྱེད་པར་འཛིན་གྲྭ་མ་གྲོལ་བར་དུ་ཕ་མ་ཤི་བར་མྱ་ངན་བྱེད་པ་དང་འདྲ་བའི་རྣམ་འགྱུར་ཞིག་བཟུང་ནས་བསྡད་སོང་།
འཛིན་གྲྭ་གྲོལ་རྗེས་སློབ་གྲྭའི་གཡས་ཕྱོགས་སུ་ཡོད་པའི་རྩེད་ཐང་ཆེན་པོ་དེ་བརྒྱུད་ནས་འགྲོ་སྐབས། ནམ་རྒྱུན་ཡིན་ན་སློབ་གྲོགས་ཚོས་དེ་གར་ལུས་རྩེད་རྩེད་པ་དང་གད་མོ་དགོད་བཞིན་སྐད་ཆ་བཤད་པ་སོགས་སེམས་པ་་སྤྲོ་བའི་སྣང་ཚུལ་མང་པོ་ཞིག་མཐོང་རྒྱུ་ཡོད་ཀྱང་། དེ་རིང་དམག་འཁྲུག་གི་སྔོན་བརྡ་སྤྲད་པའི་གྲོང་གསེབ་ཅིག་གི་མི་དམངས་དང་འདྲ་བར་སློབ་ཕྲུག་ཚང་མ་ཁ་ཁུ་སིམ་པོའི་ངང་རང་རང་ས་རུ་དེབ་ཀློག་པ་པའམ་མི་གཉིས་གསུམ་རེ་མཉམ་དུ་འཛོམས་ནས་སྐད་ཤུགས་ཆུང་ངུས་ཅི་ཞིག་རྗོད་བཞིན་ཡོད་ཅིང་། གལ་སྲིད་མི་གཞན་ཞིག་ཁོ་ཚོའི་འཁྲིས་སུ་བསླེབས་ཚེ་ལམ་སང་ཅི་ཡང་རྗོད་ཀི་མེད་པའི་རྣམ་འགྱུར་ཞིག་སྟོན་བཞིན་འདུག ངས་ངོ་མ་གློ་བུར་ཐོག་རྒྱག་ཏུ་བྱུང་བའི་གནམ་ས་མགོ་མཇུག་ལྡོག་པའི་སྣང་ཚུལ་འདི་ལ་བཟོད་བསྲན་བྱེད་མི་ཐུབ། མི་སུ་ཞིག་ལ་འདིའི་སྐོར་སྐད་ཆ་ཞིག་དྲིས་ན་ལེགས་པའི་བསམ་བློ་གཏོང་བཞིན་པའི་དུས་སུ། རྒྱབ་ལོགས་ནས་གློ་བུར་དུ་མི་ཞིག་གིས་ངའི་ཕྲག་པར་ལག་པས་གཞུ་ཙམ་བྱས་ཏེ། ཝེ། ཅི་ཞིག་ལ་བསམ་བློ་གཏོང་གི་ཡོད་ཟེར་བས། ངས་མི་དེའི་སྐད་གདངས་ལས་དེ་ནི་ཡིས་ལིས་ཡིན་པ་ཤེས་ནས་ལམ་སང་མོའི་ཕྱོགས་སུ་མ་བལྟས་པར་མོས་གོ་ཐུབ་པའི་སྐད་ཤུགས་ཆུང་ངུས། ང་ལ་ཁྱོད་རང་ལ་སྐད་ཆ་ཞིག་འདྲི་རྒྱུ་འདུག་པས་དོ་དགོང་འཛིན་གྲྭ་གྲོལ་རྗེས་སློབ་གྲྭའི་གཡོན་ཕྱོགས་སུ་ཡོད་པའི་ཟ་ཁང་ཆུང་ཆུང་དེའི་ནང་དུ་ཤོག་ཅེས་བཤད་རྗེས་མོ་ལ་མིག་གིས་ཀྱང་མ་བལྟས་པར་རང་གི་ཉལ་ཁང་གི་ཕྱོགས་སུ་ཕྱིན་པ་ཡིན། སྤྱིར་ཡིན་ན་སློབ་གྲྭའི་ར་སྐོར་གྱི་དཀྱིལ་དེ་གར་རྒྱལ་དར་དམར་པོ་ཆེན་པོ་ཞིག་འཕྱར་ཡོད་པ་མ་གཏོགས་སློབ་གྲྭའི་ཁོར་ཡུག་ཏུ་དར་ཆ་གཞན་མེད་ཀྱང་། དེ་རིང་འཛིན་གྲྭའི་ཐོག་ཁང་དང་དགེ་རྒན་ཚོའི་གཞུང་སྒྲུབ་ཁང་། དཔེ་མཛོད་ཁང་དང་སློབ་མའི་ཉལ་ཁང་སོགས་ཁང་བརྩེགས་ཡོད་ཚད་ཀྱི་ཐོག་ཁར་སྐར་ལྔའི་དར་དམར་ཆེ་ཐག་ཆོད་རེ་འཕྱར་འདུག་ཅིང་། ཏང་ལ་ཡིད་ཆེས་ཡོད་ཀྱང་ཏང་གིས་སྔོན་བརྡ་ཅི་ཡང་མེད་པར་ཡོད་ཚད་དམར་པོར་སྒྱུར་བའི་བྱ་སྤྱོད་འདི་ལ་མགོ་འཐོམས་པ་ནི་ང་གཅིག་པོ་མ་ཡིན་པར་སློབ་གྲྭ་འདིའི་ནང་གི་དགེ་སློབ་ཧ་ཅང་མང་པོ་ཞིག་ཡིན་པ་ནི་ཐེ་ཚོམ་ཅི་ཡང་བྱེད་མི་དགོས་པ་ཞིག་རེད། མུ་འགོད།
དེ་ལས་ཀྱང་ཧང་སངས་པ་ཞིག་ལ་ཁོས་ཁ་སང་ངའི་རྩ་ནས་གཡར་བའི་ཕྱི་རྒྱལ་གྱི་བརྩམས་སྒྲུང་རྒྱ་སྒྱུར་མ་