—ཁེ་ན་སྒྲ་ནས་བོད་ཀྱི་འབྲོག་ཁྱི་ཞིག་མཐོང་རྗེས།
ཚུར་ལ་ཉོན་དང་འབྲོག་པ་ཀླུའུ་རྒན་ཚོ།
ཁྱོད་ཚོར་སྒོར་མོ་དགོས་པ་ང་ཡིས་ཤེས།
ཁྱོད་ཚོར་སྒོར་སྨྱོ་བྱུང་བ་ང་ཡིས་རྟོགས།
ཁྱོད་ཚོས་རང་གཤིས་བརླགས་པ་ཁོ་བོར་གསལ།
ཁྱོད་ཚོའི་ཧམ་སེམས་འབར་བ་བདག་གིས་མཐོང་།
ང་ནི་ཁྱོད་ཚོའི་ཕ་མེས་ཡང་མེས་ནས།
མེད་ཐབས་མེད་པའི་སྒོ་ཟོག་ཉག་གཅིག་སྟེ།
ཉིན་མོར་འགྲུལ་བ་ཆ་མེད་ངས་བཀག་ཡོད་།
མཚན་གྱི་རྐུན་མ་སེམས་མེད་ངས་བདའ་ཡོད།
བར་གྱི་གཅན་གཟན་གྲངས་མེད་ངས་དཀྲོགས་ཡོད།

ལུ་གུ་ཆུང་ཆུང་ཚེ་སྲོག་ངས་བསྐྱབས་ཡོད།
བྱིས་པ་ཆུང་ཆུང་རྩེད་རོགས་ངས་བྱས་ཡོད།
ང་ནི་རྒན་རྒོན་ཀུན་གྱི་འདུག་རོགས་ཡིན།
ང་ནི་གཡུ་སྦྲ་སྨུག་པོའི་བླ་གཡུ་ཡིན།
ང་ནི་ཁྱེད་ཀྱི་མར་ལོ་ནག་རིལ་ཡིན།
ང་ནི་ཁྱེད་ཀྱི་སྲུང་མའི་མགོན་ཁྱི་ཡིན། 
ང་ཡི་ཕ་མེས་ཡང་མེས་ཚང་མ་ཡིས།
ཁྱོད་ཚོའི་ཕ་མེས་གྲངས་ཀ་མེད་པ་ཞིག
ང་ཡིས་ཁྱོད་ཚོ་བཞིན་དུ་དྲིན་གྱིས་བསྐྱངས།
ཕར་ལ་འགྲོ་དུས་སྐྱེལ་མ་ངས་བྱས་ཡོད།
ཚུར་ལ་ཡོང་དུས་བསུ་མ་ངས་བྱས་ཡོད།
བཟའ་བཏུང་ངན་ངོན་ཙམ་གྱིས་ང་ཆོག་ཡོད།
ཉལ་ས་ཐེབས་ཆག་ཅིག་ཏུ་ང་བསྡད་ཡོད།
ཉིན་གང་ཕྱི་ནང་གཉིས་ཀར་ངས་བལྟས་ཡོད།
ཉིན་རིང་ལས་ཀྱིས་དུབ་པའི་ཁྱེད་ཅག་གིས།།
མཚན་རིང་སྔུར་བ་འཐེན་པའི་ནམ་གུང་ཡང་།
ངས་ནི་རྣམ་ཤེས་ལྕགས་སྐུད་ལྟར་བསྒྲིམས་ནས།
རང་སྲོག་དམར་པོ་འབེན་ལ་བཙུགས་བྱས་ཏེ།
དགྲ་ཇག་གཅན་གཟན་འཇིགས་པ་མ་ལུས་བསད།
ཁྱེད་ཀྱི་ནང་མིའི་བདེ་སྡུག་ཁོ་ནའི་ཆེད།
ང་ནི་དགུན་གསུམ་ཁ་བའི་ཁྲོད་དུ་ཉལ།
ཁྱེད་ཀྱི་རྟ་ནོར་ལུག་གསུམ་སྲུང་བའི་ཕྱིར།
ཁོ་བོ་དབྱར་གསུམ་ཆར་བའི་ནང་དུ་བརྒྱུགས།
ངེད་ཅག་བར་གྱི་བརྩེ་དུང་ཟབ་མོའི་མདུན།
སྐེ་ལ་ལྕགས་ཐག་བསྐོན་ཡང་བཟོད་པར་བྱས།
ཕ་མེས་དུས་ཀྱི་བླ་དང་སྲོག་གི་ཕྱིར།
སྒོ་ལ་ཕུད་ཀྱང་དགའ་བཞིན་དང་དུ་བླངས།
ང་ནི་དུད་འགྲོ་ཡིན་ཡང་མི་སེམས་ལྡན།
ང་ཡིས་དགའ་སྡུག་རྣམ་འགྱུར་མ་ལུས་ཤེས།
ཁྱེད་ཅག་རང་གི་ནང་མིར་བརྩེ་བ་བཞིན།
ང་ཡང་ཁྱེད་ཀྱི་ནང་མིར་བརྩེ་དུང་ཡོད།
ཇི་སྲིད་ཁྱེད་ཀྱི་གཡུ་སྦྲ་སྨུག་པོའི་འདབས།
རྟ་ནོར་ལུག་གི་རྨིག་རྗེས་མ་རྫོགས་བར།
ང་ཡི་ལུས་པོ་ཁྱེད་ལ་བཅར་ནས་ཡོད།
ང་ཡི་རྣམ་ཤེས་ཁྱེད་ལ་དཀྲིས་ནས་ཡོད།
ཇི་སྲིད་ཁྱེད་ཀྱི་རྡོ་ཁང་སྨུག་པོའི་ནང་།
དབྱངས་གསལ་སོ་བཞིའི་གླུ་དབྱངས་མ་ཡལ་བར།
ང་ཡི་མིག་གིས་ཁྱེད་ཅག་འཚོས་ནས་ཡོད།
ང་ཡི་བརྩེ་བས་ཁྱེད་ཅག་བསྡམས་ནས་ཡོད།
ནམ་ཞིག་མགོ་ནག་བོད་པའི་ཉི་ནག་སྟེ།
རྩྭ་ཐང་རྟ་ནོར་ལུག་གིས་སྟོངས་པའི་དུས།
འབྲོག་པ་གྲོང་ཁྱེར་ཆེན་པོར་གཤར་བའི་དུས།
རོང་བ་བོད་ཀྱི་གྲས་ནས་འབུད་པའི་དུས།
རྒན་རྒོན་ལག་ན་མ་ཎི་མེད་པའི་དུས།
དར་མའི་སེམས་ན་ཞི་བདེ་མེད་པའི་དུས།
གཞོན་པའི་ཁ་ན་ཀ་ཁ་མེད་པའི་དུས།
བོད་མིར་སྒོར་ལས་བསམ་རྒྱུ་མེད་པའི་དུས།
ཁོ་བོའི་སྐེ་ཡི་ལྕགས་ཐག་སྦོམ་པོ་འདིས།
ཁོ་བོའི་སྐེ་ཡི་ལྕགས་ཐག་སྦོམ་པོ་འདིས།
མི་འདོད་བཞིན་དུ་ཤེད་ཀྱིས་འཐེན་བཞིན་དུ།
རྒྱ་ཧེའི་ལག་ཏུ་མ་འཇོག་ཞུ་བ་འཐེན།
ལྕགས་དྲའི་ནང་དུ་མ་འཇུག་ཞུ་བ་འཐེན།
གྲོང་ཁྱེར་ཆེན་པོར་མ་འཁྲིད་ཞུ་བ་འཐེན།
མ་ཉེས་བཙོན་དུ་མ་འཇུག་ཞུ་བ་འཐེན།
ཁྱོད་ཚོར་ང་མི་མཁོ་བའི་དུས་ཚོད་དེར།
ང་ཡི་ཕ་མེས་ཡང་མེས་ལས་ཅན་ཚོ།
ལོ་སྟོང་སྔོན་དུ་བག་ཡངས་རྒྱུ་བའི་གནས།
རི་ཀླུང་རི་སྐྱེས་སྣ་ཚོགས་རང་དབང་གིས།
འཚོ་བའི་གནས་དེར་ང་རང་སྐྱེལ་བར་ཞུ།
ང་ནི་ཁྱེད་བཞིན་ཁྱེད་ནི་ང་བཞིན་དུ།
རང་གི་ཕ་མེས་རིག་གཞུང་སྣུམ་པོ་དེ།
ཕ་ས་གསེར་གྱི་བྲང་མགོ་འདྲ་བའི་སྟེང་།
མིག་རིལ་ཆུ་ཤེལ་རིལ་བུ་འདྲ་བོའི་མདུན།
རྨེག་མེད་འཇོམ་པའི་ངང་ཚུལ་འཇིགས་པོ་འདི།
མཐོང་བ་ལྟ་ཅི་གོ་ཡང་མི་འདོད་པས།
ང་ནི་ཕ་སའི་རི་ཆུར་འཐིམ་ན་འདོད།
ང་ནི་ཕ་མའི་པང་དུ་ལོག་ན་འོས།
དེ་སྐད་འབྲོག་ཁྱི་ཡོངས་ཀྱི་ཚབ་བྱས་ཏེ།
སྙན་པའི་གླུ་ཆུང་བདེན་པའི་རོ་མངར་ཅན།
ཀླུ་སྨྱོན་རྒད་པོའི་མགྲིན་པ་གཡར་བྱས་ནས།
འབྲོག་པ་ཀླུའུ་རྒན་ཚོ་ལ་བླངས་པ་རྫོགས།