ཆུང་ཆུང་བྱིས་པ་ཡིན་དུས་ནས་བཟུང་སྟེ།
ངས་ཇི་སྲིད་བར་དུ་སྐར་ཚོགས་ཀྱི་འོད་སྣང་ངོ་མ་དེ་གང་ནས་འཚེར་བ་ཤེས་ན་འདོད་པ་དང་།
ངེད་ཚང་གི་ཁྱི་རྒན་རྒྱ་སྟག་གི་སྐེ་རུ་མེ་ཏོག་སེར་ཆེན་གྱི་ཕྲེང་བ་ཞིག་བསྐོན་རྗེས།
ངེད་གཉིས་ཀྱིས་རྒྱང་རིང་གི་རྐང་ལམ་ཕྲ་མོ་དེར་ཅེར་ཏེ་ཕ་རྒན་རྫོང་ཐོག་ནས་ཕྱིར་ལོག་པར་རེ་སྒུག་བྱས།
ཨ་མས་ནོར་སླས་ནས་བཞོས་པའི་འོ་མའི་ཤག་སྒྲ་སྙན་མོ་དེས་ངའི་བསམ་གཞིག་དཀྲོགས་ཐེངས་རེ་རེ་བཞིན།
ངས་རང་ཉིད་ཆེ་རུ་འཚར་དུས་ཆུང་མ་ཞིག་བླངས་ནས་ཨ་མར་འབྲི་མོ་ཚོ་བཞོ་རོགས་བྱེད་དུ་འཇུག་ན་འདོད་ཅིང་།
ཁྱིམ་མཚེས་བུ་མོ་ཚོའི་ལང་ཚོའི་ཟུར་མིག་རེ་རེ་བཞིན་མགོ་ཐོག་གི་སྐར་མདའ་བཞིན་མུན་ཁྲོད་དུ་ཡལ་ས་དེར་བསྐྱོད་ཐུབ་ན་སྙམ་པ་དང་།
དེ་དག་གི་ཁྲོད་ནས་ང་ལ་དབང་བའི་སྐར་མ་འོད་ཆེན་དེ་གང་ཡིན་ཡང་ཤེས་འདོད་དྲག་པོ་རེ་སྐྱེས་མྱོང་། དེ་དུས་སུ་འཁོར་བའི་སྡུག་བསྔལ་ཞེས་པ་དེའི་མིང་ཙམ་ཡང་ངས་མི་རྟོགས་ལ།
དེ་དུས་སུ་འདི་སྣང་འཁྲུལ་བ་ཞེས་པའི་ཐ་སྙད་དེའི་གོ་དོན་ཡང་ངས་ག་ལ་རྟོགས།
ཐ་ན་རང་གི་རྩེད་རོགས་ཁྱི་རྒན་རྒྱ་སྟག་དང་ངེད་གཉིས་ནམ་ཞིག་ཁ་གྱེས་དགོས་པ་ཙམ་ཡང་ཤེས་ཀི་མེད་ལ།
ཉིན་ཞིག་ང་རང་ཡང་འཇིག་རྟེན་འདི་ནས་བོར་བརླག་ཏུ་འགྲོ་སྲིད་པའི་གནས་ལུགས་དེ་ཡང་ཡིད་ངོར་འཆར་མ་མྱོང་།
ནམ་རྒྱུན་ཟོག་རྫིར་འགྲོ་དུས་མེ་ཏོག་གི་གཞུང་རྟ་རེ་རེ་བཞིན་རྐང་མཛུབ་ཀྱི་བར་ནས་གཅོད་པར་དགའ་ཞིང་།
རི་མགོ་མཐོ་ས་རེ་ནས་ཁྱིམ་མཚེས་བུ་མོ་ཆུང་ཆུང་དེ་ཨེ་ཡོང་གི་རེ་སྒུག་གྲངས་མེད་ཅིག་གིས་དབྱར་ཟླ་དང་སྟོན་ཟླ་བསུས།
དེ་ལྟར་ལོ་ཟླ་གང་མང་ཞིག་འགོར་བའི་རྗེས་སུ།
ངས་དབེན་དགོན་ཞིག་ནས་རང་གི་བརྩེ་དུང་དང་འཁོར་བའི་གཏམ་རྒྱུད་དག་སྙན་ངག་ཏུ་འབྲི་མགོ་བརྩམས་ཤིང་།
ཚགས་པར་དང་དུས་དེབ་མང་པོའི་ངོས་སུ་རང་ཉིད་ཀྱི་འདས་ཟིན་པའི་མི་ཚེའི་ཀྱག་ཀྱོག་ལམ་བུ་རེ་རེ་བཞིན་གང་སར་འཐེན་དུ་བཅུག་པ་ཡིན།
མ་གཞི་དགོན་སྡེ་ནི་འཁོར་བའི་ཕྱི་རོལ་ན་ཡོད་འོས་པའི་གསེར་མདོག་གི་གཞིས་ཀ་ཆུང་ཆུང་ཞིག་ཡིན་པས།
དེ་རུ་ཡང་དགའ་སྐྱོ་ཆགས་སྡང་གི་རྦ་རླབས་ནི་གཅིག་རྗེས་གཅིག་གིས་དེད་དེ་འོང་བཞིན་ཡོད་པ་དང་།
ནང་ཆོས་ཀྱི་དད་སེམས་དང་སྒྱུ་རྩལ་གྱི་བསླུ་བྲིད་གཉིས་ཀའི་བར་ན་ལུས་པའི་ང་དང་ངའི་ཆོས་གྲོགས་དག་ནི།
ངུར་སྨྲིག་གི་རྨི་ལམ་གྲངས་མེད་ཅིག་ལ་ལོ་ངོ་སྟོང་ཕྲག་གི་ས་རྡུལ་བན་བུན་དུ་བབས་ཡོད་པའི་ལྡེབས་ཁྲོད་ཀྱི་ལྷ་སྐུ་རེ་རེ་ཡིན་ལ།
ཞིང་ཁམས་འདིའི་དྲི་བཟང་འཐུལ་བའི་སྤོས་ཀྱི་དུ་ཞགས་ཀྱ་ཀྱུ་མ་དག་གིས་ང་ཚོ་ལ་ཚེ་འདི་ཕྱིའི་ཉི་འོད་སེར་པོ་ཞིག་བར་མེད་དུ་བཀྱེས་བྱུང་།
བླ་མའི་གདམས་ངག་གིས་དབང་རྩ་སྦྲིད་པའི་ང་ཚོས་རང་རང་གི་ལང་ཚོའི་ཡིག་འབྲུ་རེ་རེ་བཞིན་དགོན་རྒྱབ་ཀྱི་བྲག་རིའི་ངོས་སུ་བརྐོས་ཤིང་།
ལོ་ཟླའི་རླུང་བུ་དང་དར་ལྕོག་ཟད་པོ་དག་གིས་དེ་ལ་ཅི་མི་སྙམ་པའི་ངང་བྱིལ་བྱིལ་ཅི་ཙམ་བྱས་ཀྱང་ང་ཚོར་བདེ་སྡུག་གི་ཚོར་བ་ཡོངས་སུ་བྲལ།
ཆེས་མཐའ་མཇུག་གི་དབྱར་གཞུང་ཞིག་ཡིན་འོས་པའི་ཕྱི་དྲོ་དེར།
ངས་རང་གི་བྲང་གཞུང་དྲོན་མོ་ཕ་ཡུལ་གྱི་རྩྭ་ཐང་གི་ཕང་བར་ཡུན་རིང་ཞིག་ལ་གླན་ནས་བསྡད་ཅིང་།
དེ་དུས་ཀྱི་ཚོར་བ་ནམ་ཡང་བརྗེད་ཐབས་བྲལ་བ་དེའི་ཀློང་ནས་ངས་རང་ཉིད་ཀྱི་དབེན་དགོན་དེ་ཡང་སྨུག་ཞགས་ཀྱིས་བཏུམས་པ་མཐོང་བྱུང་ཨང་།
གང་ལྟར་ཇི་སྲིད་བར་དུ་རྨི་ལམ་ཁྲོད་ནས་ཡང་དང་ཡང་དུ་མཇལ་བའི་ཕ་ས་སྨུག་པོ་དེ་དྲན་ཐེངས་རེ་རེ་བཞིན།
ངས་རང་ཉིད་ཀྱིས་བཟོས་པའི་ནོར་འཁྲུལ་གྲངས་ལས་འདས་པ་དེ་ཚོར་འགྱོད་གདུང་ཅི་ཡང་མེད་པར་བྱིལ་བྱིལ་རེ་བྱེད་ཞོར།
སེམས་པ་ལྷོད་ལ་བབས་ནས་ཆིལ་ཆིལ་རྦབ་ཆུ་ལྟ་བུའི་བཞུར་རྒྱུན་དྲག་ལ་རྔམ་པའི་མི་ཚེའི་བརྗེད་བྱང་གི་སྙན་ངག་འདི་བྲིས་པ་ཡིན།
*གོང་གི་པར་དེའི་པར་པ་རང་ཉིད་ཡིན།
སྟོན་པ། ངའི་གཟན་སྣེ་མེ་རུ་འབར་སོང་། ཁྱོད་འཇིག་རྟེན་དུ་བཞུགས་དུས། གྲྭ་པ་རེ་རེའི་གཟན་སྣེ་རུ་ཞི་བདེའི་རླུང...
0 བསམ་ཚུལ་འདོན་པ།:
Post a Comment