སྨྱོན་པའི་འཇིག་རྟེན།: སྙན་ངག་གི་ལམ་དུ་དྲངས་པའི་རྟོགས་བརྗོད་སྤྲིན་གྱི་མེ་ཏོག

རྗེ་ཉིད་དགུང་ལོ་སུམ་ཅུའི་ནང་ཕེབས་དུས་ཀྱི་སྐུ་པར།
ཨོཾ་སྭ་སྟི། མཐའ་དག་ཤེས་བྱའི་སྔོ་བསང་དཀྱིལ་འཁོར་ཁྱོན། །མཁྱེན་རབ་དགུ་ཚིགས་སྟོབས་ཀྱིས་ཡོངས་འཁྱུད་ཅིང་། །ལུང་རིགས་ཉི་ཟླའི་བགྲོད་པ་མགྱོགས་འགྲོའི་འོད། །ཐུབ་བསྟན་པད་ཚལ་དཔྱིད་དུ་སྤྲོ་དེ་བསྔག །ཟླ་ཤེལ་ཚོམ་བུར་སྨིན་པའི་འཇིག་རྟེན་ཁྱོན། །ཐུགས་བསྐྱེད་སྰ་ལའི་ནགས་ཀྱིས་ཡོངས་དཀྲིགས་ཏེ། །དགེ་ལེགས་གཡུར་ཟའི་འབྲས་བུ་ལྷུན་འཇོ་བ། །སྐྱབས་གཅིག་འཁོར་ལོའི་མགོན་པོ་གཙུག་གིས་མཆོད། །བགྲང་ཡས་རྒྱལ་ཀུན་མཁྱེན་རབ་ལི་ཁྲིའི་རྡུལ། །བརྒྱད་གཉིས་ལང་ཚོའི་དཔལ་དུ་བརྩེགས་པའི་མགོན། །རྨོངས་མུན་མཐར་བྱེད་འཇམ་དཔལ་དཔའ་བོ་ཞེས། །ཚེ་རབས་ལྷག་པའི་ལྷ་དེ་ཡང་ཡང་དྲན། །རྗེས་ཆགས་སྒྱུ་མའི་རོལ་བ་འབྱམས་ཀླས་ཀྱིས། །མཐའ་དག་ཤེས་བྱའི་མཛའ་བོ་འགུག་མཁས་མ། །དྲན་པས་གདུང་སེལ་མཚོ་བྱུང་ངག་གི་ལྷས། །སྙན་ཚིག་རིག་པའི་རྩེད་འཇོ་དེང་འདིར་སྒྱུར། །བགྲང་ཡས་བདེ་གཤེགས་རྡུལ་སྙེད་བསྐལ་པའི་ཡུན། །མཆོད་པའི་ལེགས་བྱས་ཕྲ་རབ་རྡུལ་རྫས་དང་། །བླ་མའི་བ་སྤུ་གཅིག་ཙམ་མཆོད་པ་ཡི། །དགེ་ཚོགས་རི་རབ་མཉམ་མིན་ཐུབ་པས་གསུངས། །དེ་ཕྱིར་སྟོང་གསུམ་སྣ་བདུན་རིན་ཆེན་གྱིས། །བཀང་སྟེ་ཕུལ་ཀྱང་བཀའ་དྲིན་ཆ་ཤས་ཙམ། །གཞལ་བར་མི་སྤྱོད་ཁྱབ་བདག་འཁོར་ལོའི་མགོན། །གང་གི་རྟོགས་བརྗོད་དྲུག་སྐྱེས་ཚངས་པའི་གླུ། །བརྩེ་ལྡན་བླ་མའི་གསང་གསུམ་འོད་དམར་རྡུལ། །འགྲོ་ཚོགས་གུས་བློའི་སྐྱེད་ཚལ་ཉམས་དགའ་བར། །དད་གསུམ་འདབ་བརྒྱས་རེག་ཕྱིར་སྐྱེས་སྟོབས་ཀྱི། །ཤེས་རབ་དབྱར་གྱི་དཔལ་མོ་ཅི་ཡང་བྲེལ། །རླབས་དཀར་མྱོས་བུམ་མཐོ་ལྡན་ཆུ་གཏེར་མོ། །འབྲས་ལྡན་རྐང་འཐུང་གཞོན་ནུས་རོལ་བ་ལས། །འཛམ་བུའི་གྲགས་དཀར་ལང་ཚོ་མ་རྙིང་པའི། །འཇིག་རྟེན་དགེ་ལེགས་སྣོད་དེ་རིངས་ནས་ལྷམས། ། དེ་ ཡི་བྱང་ཕྱོགས་ནོར་འཛིན་དཔལ་མོའི་བཞིན། །རྫོགས་ལྡན་སྨུག་རྩིས་བྲན་པའི་དཀྱིལ་འཁོར་དུ། །སྔོ་བསང་ས་ལ་ལྷུང་བས་མི་མཚོན་པའི། །མཚོ་ཆེན་ཁྲི་ཤོར་རྒྱལ་མོ་ཞེས་བྱ་མཆིས། །དེ་དེའི་གནོད་སྦྱིན་ཕྱོགས་སུ་གདོད་མ་ནས། །གང་གང་སྡེ་བཞིའི་རེ་ཁྰ་མངོན་མཛེས་པའི། །བརྗིད་བརྗིད་འབྲོག་སྡེ་རེ་སྦྲ་སྨུག་པོ་ཅན། །མང་མང་རྐང་བཞིའི་འཕེལ་ཁའི་ལོངས་ལ་རྩེན། །
གཡུ་ལོ་བཀོད་པའི་ཞིང་གི་དཔལ་ཡོན་གྱི། །མཛེས་རིས་མོག་པོར་བགྱི་བའི་ཁོར་ཡུག་ཏུ། །དབང་གཞུའི་དོ་ཤལ་གསེར་ལྡན་ཕང་བ་རུ། །ལྷུང་འདྲའི་མེ་ཏོག་སྦྲང་རྩིའི་མཛོད་དུ་དཀྲིགས། །རྩི་ལྗོན་ནགས་མའི་ཀློང་དུ་གར་རྩེན་པའི། །སྣ་ཚོགས་རི་སྐྱེས་དར་མའི་རྩེད་འཇོ་དང་། །སྤུ་སྡུག་གཉིས་སྐྱེས་མཁའ་རུ་འཕུར་ལྡིང་གར། །དགེ་ལེགས་དུས་སྟོན་རྫོགས་པའི་ཆོ་གར་སྣང་། །དཀར་མཛེས་ཕང་ཕུང་བརྩེགས་པའི་ཆུ་ཁུར་ལས། །སྤྲིན་གྱི་མེ་ཏོག་དུས་དང་དུས་སུ་འཇོ། །གནག་སྣུམ་ཞིང་ས་གཤིན་པོའི་ཕང་བ་རུ། །འབྲུ་དྲུག་གསེར་གྱི་སྙེ་མའི་མགོ་བོ་དུད། །རྒྱལ་ཀུན་བརྩེ་ཆེན་ཏིང་འཛིན་དཀར་པོའི་རོ། །སྙིང་པོར་ཡོངས་སྨིན་ཡི་གེ་དྲུག་མའི་དབྱངས། །རི་མོ་གསུམ་པའི་གུར་ཁང་ལ་འཕོས་པའི། །སྣ་མང་རྐང་གཉིས་སྡེ་བཞིའི་དཔལ་ལ་སྤྱོད། །དེ་རུ་དགེ་ཚོགས་ངང་པ་དཀར་པོའི་ཁྱུས། །ཀུན་བྱེད་ཆུ་མཚོའི་ཕང་པ་ཡོངས་གཏམས་པའི། །མཁའ་འགྲོའི་མཚན་བཀྲ་ཡུམ་གྱི་སྤྲིན་རུམ་དུ། །གཟུགས་སྐུའི་ཟླ་གཞོན་ཐུགས་བསྐྱེད་འཕྲུལ་གྱིས་དྲངས། །ནམ་ཞིག་ཡུམ་མཆོག་ཉ་ཕྱིས་ཁོག་ཡངས་ལས། །ཚོགས་གཉིས་མུ་ཏིག་དཀར་པོའི་སྙིང་པོ་རུ། །སྨིན་པའི་རྟེན་འབྱུང་ཡིད་འཕྲོག་མ་ལིཀྐ། །རྫོགས་ལྡན་དཔལ་མོ་མཛེས་པའི་རྒྱན་གྲུབ་རྨད། །དེ་ཡི་ཚེ་ན་དཀར་ཕྱོགས་ལེགས་བྲིས་ཚོགས། །དགའ་བའི་སྒྲ་བརྒྱ་དགོད་པའི་དབྱངས་སྙན་དང་། །ལུས་མེད་སྙིང་ལ་གདུང་བའི་མེ་འབར་ཏེ། །ཀྱི་ཧུད་ཆོ་ངེ་ལྡིར་བ་འགྲན་པ་བཞིན། །ཇི་ལྟར་གདོང་ལྔའི་ཕྲུ་གུ་ན་ཕྲ་ཡང་། །སྣ་ཚོགས་རི་སྐྱེས་ང་རོས་གཞོམ་པ་ལྟར། །རྒྱལ་སྲས་ཟླ་ཤེལ་མྱུ་གུའི་དུས་སུ་ཡང་། །སྐྱེ་རྒུའི་སྙིང་གི་མུན་པ་དྲུངས་ནས་ཕྱུང་། །ཕར་ཕྱིན་གྲངས་ཀྱི་དཀྱུས་རིང་མིག་ཡངས་མར། །ན་ཚོད་ལེགས་བྲིས་གཞོན་ནུས་འཁྱུད་པ་ན། །ཆོས་ཚུལ་གཡུར་ཟའི་འབྲས་བུས་ཡོངས་དུད་པའི། །ཁུ་བོ་ས་བརྟོལ་ལྗོན་པའི་བསིལ་གྲིབ་བསྙེགས། །གསང་ཆེན་གསང་བ་དབྱར་སྐྱེས་སྒྲ་བརྒྱའི་དབྱངས། །ཐུགས་བསྐྱེད་སྤྲིན་སྔོན་མཛོད་དུ་ལེགས་འཁྱིལ་བ། །ལྰ་མོའི་གོང་སའི་བཀའ་ལུང་བདུད་རྩིའི་ཆར། །ལེགས་ཚོགས་འོད་ལྔའི་རྡུལ་དང་ལྷན་ཅིག་བསྙིལ། །གང་གི་གཙུག་སྐྱེས་ཨུཏྤལ་དཀར་པོའི་ནགས། །ཞབས་སེན་འོད་བརྒྱས་བསྐྱངས་པའི་ཉིན་མོའི་མགོན། །གང་དེའི་ཡང་སྲིད་ཟླ་བ་གཞོན་ནུའི་གར། །སྒྱུར་བའི་བྱེད་པོ་མཆོག་ཏུ་མགོན་ཁྱོད་བསྔགས། །བྱང་ཆེན་གཏན་བདེའི་སྲོག་ལ་ཆེར་རྔམ་པའི། །འདི་སྣང་སྲིན་མོའི་འཛུམ་དཀར་རྒྱང་བསྲིངས་ཏེ། །རྣམ་གྲོལ་ཅང་ཤེས་རྒྱལ་པོའི་འཕྲུལ་འདེགས་ལ། །རླབས་ཆེན་ཐུགས་བསྐྱེད་འཛིན་བྱེད་ལྷོད་མ་གྱུར། །དེ་སླད་གཙུད་ཕུད་རལ་བའི་མེ་ཏོག་ཕོན། །དབྱིག་ལྡན་མགུལ་བ་མཛེས་པའི་རྒྱན་བྱིན་ཏེ། །ངུར་སྨྲིག་གོས་བཟང་འཆར་ཀའི་སྤྲིན་གསར་པས། །མཚན་བཟང་གཟུགས་སྐུའི་ཉི་གཞོན་བཀླགས་པར་གྱུར། །ལྔ་རིག་འོ་མཚོའི་འཇིངས་ཟབ་མ་བགྲོད་པར། །སྐུ་གསུམ་དབྱིག་གི་མཛོད་ལ་དབང་མིན་པས། །ཁྱེད་སྐུ་གུས་རྟག་ཆུ་ཡི་ཤིང་རྟར་བཅས། །བཀྲ་ཤིས་གཡས་འཁྱིལ་ནོར་བུའི་གླིང་དེར་གཤེགས། །དེ་རུ་ལུང་རིགས་རལ་གྲིའི་འཕྲུལ་འཁོར་གྱིས། །ཕས་རྒོལ་མགྲིན་པའི་ཁེངས་པ་སར་བསྙིལ་བའི། །བཤེས་གཉེན་ལུང་རྟོགས་དཔུང་པ་སྦོམ་པའི་ཚོགས། །དད་གསུམ་དགེ་ལེགས་གྲོང་དུ་ཉེ་བར་བསུས། །གང་ཁྱེད་མཁྱེན་རབ་དགུ་ཚིགས་ཞགས་པ་ཡིས། །མཐའ་དག་ཤེས་བྱའི་སྔོ་བསང་ཡོངས་འཁྱུད་པས། །རྒྱལ་ཀུན་ཆོས་དབྱིངས་སྣང་བའི་མུ་ཁྱུད་ཅན། །རེ་ཞིག་སྐྱེངས་པའི་སྤྲིན་སྔོན་གོས་སུ་བཀླུབས། །ལྔ་རིག་ལི་ཤི་དཀར་པོའི་སྐྱེད་ཚལ་དུ། །སྐྱེས་སྦྱངས་རིག་པའི་གོམ་སྟབས་མཛེས་བསྒྱུར་པས། །ལེགས་བཤད་སྒྲེག་པའི་བསུང་ཞིམ་ནམ་མཁའི་ནགས། །སྐལ་བཟང་དྲི་བཞིན་མཛེས་མའི་དཔལ་དུ་མཆེད། །ལུང་རིགས་ཉག་ཕྲན་བའི་མཚོན་རྣོན་གྱིས། །ཕས་རྒོལ་འབོད་སྒྲོག་སྤོབས་པའི་མགྲིན་པ་བཅུ། །ངལ་མེད་དུམ་བུར་བཅད་པའི་དགའ་སྟོན་ལ། །ཕྱོགས་ཀྱི་བསྔགས་སྐྱེས་སི་ཏའི་འཛུམ་དཀར་གཡོ། །འཇི༷གས་མེ༷ད་དྲན་དབང་བྱུ་རུའི་ནགས་ཀློང་དུ། །རྣམ་དཔྱོད་སྤོས་ཀྱི་གཉིས་འཐུང་རབ་རྩེན་པའི། །ཤེས་བྱའི་རྒྱ༷་མ༷ཚོ་འཐུངས་པའི་དྲང་སྲོང་ཆེ། །ལེགས་བཤད་གངྒྰ་འཇོ་བའི་མགོན་དུ་འཕོས། །ཐ༷བས་མཁ༷ས་ཞོ་འཐུང་རུས་པའི་འཕྲུལ་འཁོར་གྱིས། །རྒུད་ཚོགས་ས་འཛིན་རྐང་པའི་འགྲོས་བཅོམ་ཞིང་། །བཤད་སྒྲུབ་མིག་སྟོང་གཡོ་བའི་རྣམ་སད་བདག །བདེ་ཆེན་འཁོར་ལོའི་རྒྱན་དུ་ཉེ་བར་བསུས། །འཇམ་མགོན་ཞལ་ཆབ་ཟབ་གསང་མདོ་སྔགས་ཀྱི། །ཆོས་ཚུལ་སྦྲང་ཆར་མངར་བོའི་རྒྱུན་འཇོ་བ། །བཤེས་གཉེན་ལུང་རིགས་གློག་དམར་འོག་པག་ཅན། །དུ་མ་བདེ་ཆེན་འཁོར་ལོའི་རྒྱན་དུ་དཀྲིགས། །ཁྱད་པར་འཇི༷གས་མེ༷ད་འོད་དཀར་དྲ་བ་ཅན། །འཕྲི༷ན་ལ༷ས་དཀྱིལ་འཁོར་སྲིད་ཞིའི་མཁའ་ལ་རྫོགས། །ཟླ་མེད་རིགས་བདག་རྒྱ༷་མཚོ༷འི་མར་གསར་ཕོན། །མོས་གུས་དབང་ཕྱོགས་ས་འཛིན་རྩེ་རུ་འཕགས། །མགོན་དེིའི་ཐུགས་གསང་མགྲིན་སྔོན་རལ་ཀློང་ལས། །ལེགས་འོངས་མདོ་སྔགས་འཛད་མེད་ལམ་གསུམ་འབབ། །ཐོས་བརྩོན་ཞལ་དུ་འདྲེན་ལ་རིངས་པ་ཡི། །མགོན་ཁྱོད་སྐལ་ལྡན་ཤིང་རྟའི་རྣམ་ཐར་རྨད། །སྒྲ་ཚད་བཟོ་གསོ་ནང་དོན་རིག་པ་ཡིས། །ཐུགས་གསང་མཛོད་དུ་འཁྱིལ་དུ་དྲན་དབང་ཚོགས། །ཁྱོད་དྲུང་བོས་པ་མེད་པར་འདུ་བ་ནི། །གཉིས་སྐྱེས་མཚོ་རུ་རྩེན་པའི་དཔལ་གྱིས་མིན། །ནམ་ཞིག་རིགས་བདག་མགོན་དེའི་བཀའ་ལུང་ནི། །མང་ཡུལ་དགའ་བ་བརྒྱ་ལྡན་ལྷའི་མདུན་སར། །ཆོས་སྡེ་རྣམ་པར་རྒྱལ་བའི་ཁང་བཟང་ཆེ། །སྐྲུན་དང་ཐུབ་བསྟན་ཕྱོགས་མཐར་རྒྱས་ཞེས་གསུངས། །དེ་ཡི་ཚེ་ན་ཐབས་ཤེས་མཇུག་མེ་ཡིས། །ལུས་མེད་སྲིན་གྲོང་ཐལ་བར་བརླགས་མཛད་པའི། །མགོན་ཁྱོད་ཞབས་ཟུང་ཨུཏྤལ་དམར་པོའི་རྒྱན། །མང་ཡུལ་ནོར་འཛིན་དགའ་མའི་མགུལ་བར་ལྷུང་། །མགོན་པོ་གང་གི་རླབས་ཆེན་ཐུགས་བསྐྱེད་ཀྱི། །ཝུ་ཕྲེང་གཡོ་ལྡན་མཛད་བཟང་ཆུ་གཏེར་རླབས། །ཤེལ༷་དཀར་ལུང༷་བའི་གཤོང་དུ་འཕྱུར་བ་ན། །དཀར་ཕྱོགས་ལྷ་ཀླུའི་ཡིད་ལ་ངལ་གསོ་ཐོབ། །རིམ་བཞིན་མདོ་སྔགས་ཆུ་སྐྱེས་དཀར་པོའི་ཚལ། །བྱང་ཆེན་སྦྲང་རྩིའི་མཛོད་དུ་དཀྲིགས་པའི་སྡེ། །འོག་མིན་ཞིང་གི་ལང་ཚོར་འཕོས་པ་ན། །རྒྱལ་ཀུན་བསྔགས་པའི་རོལ་མོ་རྡུང་ལ་བྲེལ། །

རྗེ་བླ་མའི་གདན་ས་ཐར་ཤུལ་དགོན་རྣམ་དག་ཁྲིམས་ལྡན་གླིང་།
བློ་བཟང་རྒྱལ་བའི་ཞལ་ཆབ་ མ་དྲོས་ཀླུང་། །མ་རྨད་ཆེ་བའི་ཁ་འབབ་རྣམ་པ་བཞིས། །སྐུ་གསུམ་ཟླ་བའི་མ་མར་གཞོལ་བ་ཡི། །བྱང་ཆུབ་ལམ་གྱི་རིམ་པའི་བཤད་སྲོལ་བཙུགས། །རིམ་གཉིས་ཟླ་གདོང་སྒེག་མོའི་འགྲམ་ཆང་གིས། །ཟུང་འཇུག་སིནྡྷུ་ཝ་རའི་འཛུམ་དཀར་རྒྱ། །གཏན་བདེའི་དཔྱིད་དུ་གྲོལ་བའི་ཟབ་མྱུར་ལམ། །གསང་ཆེན་རྒྱུད་སྡེ་རྣམ་བཞིའི་སྒྲུབ་མཆོད་དར། །སྟོང་ཆེན་དགའ་བྱེད་ཁྲོས་པའི་མདའ་གཅིག་གིས། །ངར་འཛིན་འབོད་སྒྲོག་མགྲིན་པ་ནག་པོའི་ཕྲེང་། །དུམ་བུར་གཅོད་པའི་ཆོས་ཚུལ་བླ་མེད་པ། །ཌྰ་རྐང་སྒྲ་ཆེན་གླལ་བའི་ཟིལ་ལ་འབྱམས། །རྣམ་བཞིའི་འཕྲིན་ལས་རྡོ་རྗེའི་མེ་ཆར་གྱིས། །ཞིང་བཅུའི་དགྲ་བགེགས་བྲག་གི་ས་འཛིན་ཚོགས། །ཕྱེ་མར་ཡོངས་བརླག་ལམ་གསུམ་སྲུང་མའི་དཔུང་། །རབ་སྐུལ་སྒྲུབ་མཆོད་སྤྲིན་སྔོན་ཕྱུར་བུར་གཏིབས། །འཁོར་ལོ་གསུམ་གྱི་སྦྲང་རྩ་མངར་པོའི་རོ། །ཐོས་བརྩོན་ལྗགས་ཀྱིས་མྱོང་བའི་རིག་གྲོལ་སྡེ། །ངུར་སྨྲིག་གཤོག་ཟུང་སྒྱུར་བའི་དཔལ་ཡོན་ཅན། །ལུང་རིགས་དབྱངས་སྙན་སྒྲོག་པས་ས་འདི་དཀྲིགས། །མགོན་ཁྱེད་མཁྱེན་བརྩེ་ཕང་ཕུང་བརྩེགས་པའི་སྤྲིན། །འགྲོ་ཁམས་མོས་པའི་མཁའ་རུ་རྩེན་པ་ན། །ལེགས་བཤད་སྦྲང་ཆར་ལུང་རིགས་འོད་ཕྲེང་ཅན། །རྣམ་གྲོལ་མྱུ་གུ་ལྡེམ་པའི་གསོས་སུ་འཇོ། །ཁྱེད་གསུང་ལྷ་ཆེན་རལ་བའི་དག་བྱེད་རྒྱུན། །དད་གསུམ་མགྲིན་པར་བབས་པའི་དུག་ཅན་ཚོགས། །བཅས་བསགས་སྡིག་ལྟུང་ཚ་གདུང་ཡོངས་ཞི་སྟེ། །དགེ་ལེགས་འཆི་བ་མེད་པའི་ཚལ་དུ་འཕོས། །ལྔ་བདོའི་སྨག་རུམ་སྟུག་པོ་ཡོངས་དཀྲིགས་པའི། །མཐའ་འཁོབ་ལྗོངས་འདིར་མགོན་ཁྱོད་མཛད་འཕྲིན་གྱི། །སྣང་བའི་མུ་ཁྱུད་རྩེན་པའི་འཇུག་ངོགས་སུ། །ལུང་རྟོགས་བསྟན་པའི་པད་ཚལ་ཆེ་ཆེར་རྒྱས། །དེ་མཐུས་ལྔ་རིག་གསེར་གྱི་འདབ་མའི་གླུས། །རྫོགས་ལྡན་གཉིད་ལས་སློང་པའི་སྦྲང་རྩིའི་བུ། །གཅིག་མིན་དཔག་ཚད་བྱེ་བའི་ཁྱོན་བཀང་སྟེ། །ས་འདི་འོག་མིན་དཔལ་ལས་ལན་བརྒྱར་འགོངས། །མགོན་ཁྱེད་གསང་གསུམ་གསེར་འཁོར་རྩིབས་སྟོང་ཅན། །ཕྱོགས་ཀྱི་མུ་ཁྱུད་གླིང་བཞིའི་མཁར་རྩེན་པས། །རིག་འཛིན་རྒྱལ་ཕྲན་སྐྱོང་བའི་ས་སྐྱོང་འབུམ། །ཁྱོད་ཞབས་སྤྱི་བོས་ལེན་ལ་སྔ་ཕྱི་རྩོད། །རྒྱལ་ཀུན་གསང་བ་འབྱམས་སུ་ཀླས་པའི་མཁའ། །ཐུགས་བསྐྱེད་དགུ་ཚིགས་ཞགས་པས་ཉེར་བཅིངས་པའི། །ལྰ་མོའི་གོང་ཞབས་གཙུག་རྒྱན་སྤོས་རྫིང་དུ། །ཞབས་ཆེན་ངང་པའི་རྒྱལ་པོ་ཡུད་ཀྱིས་གཤེགས། །འཕགས་ཡུལ་མཁས་མང་མགྲིན་སྔོན་རལ་ཀློང་ལས། །ལེགས་འོངས་ལྔ་རིག་ལམ་གསུམ་འབབ་པའི་རྒྱུན། །མཁྱེན་རབ་ཧུབ་ཀྱིས་གསོལ་བའི་དྲང་སྲོང་ཁྱེད། །གདུལ་བྱའི་ཚ་གདུང་གཞིལ་བའི་གཉེན་དུ་བསྔགས། །རྒྱལ་ཀུན་གསང་འཛིན་ངུར་སྨྲིག་བླ་གོས་ཅན། །གང་དེའི་མཁྱེན་རབ་གསེར་གྱི་ཀྱོ་བའི་འཕྲུལ། །ཁྱོད་ཡོན་ཆུ་གཏེར་འཇིངས་སུ་བཏབ་པ་ན། །མདོ་སྔགས་གསེར་མིག་ངལ་བ་མེད་པར་བཀུག །ཐུབ་བསྟན་སྨུག་རྩིས་བྱང་རྒྱུད་མཛེས་མའི་གདོང་། །འཁྱུད་པའི་རྟེན་འབྱུང་དུས་སུ་ན་དར་བས། །དཀྱིལ་འཁོར་རྒྱ་མཚོའི་བྱེད་པོར་ཁྱོད་བཞེངས་ཏེ། །རིག་འཛིན་དཔའ་བོས་མཁའ་སྤྱོད་དོག་པོར་བྱས། །རྒྱལ་ཀུན་འཕྲིན་ལས་ཀུན་མཛད་པད་འབྱུང་རྗེའི། །བཀའ་ལུང་རྡོ་རྗེ་སྤྱི་བོར་གཡོ་མེད་པའི། །དཀའ་ཕྱོགས་ལྷ་སྲུང་ལས་བཞིའི་ཕྱག་རྒྱ་ཅན ། །དྲི་ལྡན་མེ་ཏོག་ཚལ་དུ་བུང་བ་བཞིན། །བྱང་ཕྱོགས་ནོར་འཛིན་ལྷ་ལམ་ཡངས་པོའི་ཁྱོན། །ཐུབ་བསྟན་ཉི་ཟླའི་འོད་ཀྱིས་འཁྱུད་དྲགས་པས། །ཡིད་སྲུབ་སྒྲ་གཅན་གདུག་པའི་ཁ་རླངས་ཀྱིས། །རྫོགས་ལྡན་སྣང་བའི་དཀྱིལ་འཁོར་རིལ་གྱིས་ཟོས། །འཆི་མེད་མདུན་སའི་དཔལ་ལས་རིངས་འགོངས་པའི། །ཞི་བའི་གྲོང་ཁྱེར་འབུམ་ཕྲག་ཐལ་བར་བརླགས། །ཐུབ་པའི་གདུང་འཚོབ་ངུར་སྨྲིག་འཆང་བའི་ཁྱུ། །མི་སྡུག་ཁྱིམ་གྱི་གཟེབ་ཏུ་དབང་མེད་ཚུད། །ལུང་རིགས་གཡུ་རལ་འཕྱོ་བའི་གདོང་ལྔའི་དཔུང་། །སྒྲོ་འདོགས་ཁོང་སྲིན་བྱེ་བས་རབ་མནར་ཞིང་། །གདོལ་སྤྱོད་ཝ་སྐྱེས་བརྒྱལ་བའི་ཆོ་ངེ་ཡིས། །བྱང་རྒྱུད་རི་སུལ་བསྐལ་པ་ངན་པར་བྱས། །ལྔ་རིག་གླེགས་བམ་གྲངས་ཀྱིས་མི་མཚོན་པ། །བརྩེ་མེད་བསྲེག་ཟའི་ཀློང་དུ་བསྟིམས་བྱས་ཏེ། །ལྟ་ངན་གཞུང་ལུགས་ནོར་སྐྱོང་ཤི་བའི་རོ། །བློ་ལྡན་རྒོད་པོའི་ཚོགས་ཀྱི་ཟས་སུ་བྱིན། །མདོ་སྔགས་བཤད་སྒྲུབ་ཐིག་ལེའི་རེ་ཁྰ་ཡིས། །རྣམ་དཔྱོད་ལུས་མཛེས་ལུང་རིགས་མཆེ་རྣོན་ཅན། །བསྟན་འཛིན་ནགས་ཀྱི་ཤྰ་ནའི་བསྟི་གནས་སུ། །གདོལ་སྤྱོད་མགྲིན་བཟང་མྱོས་པས་ཐན་སྐད་བསྒྲགས། །འོན་ཏང་རྒྱལ་ཀུན་ཐུགས་བསྐྱེད་སྐྱ་རེངས་ཀྱིས། །ཉེར་དྲངས་ཐུབ་བསྟན་རྟ་བདུན་བདག་པོའི་གཟི། །བྱང་ཕྱོགས་པད་དཀར་ཚལ་དུ་འཕོས་པ་ན། །ལུས་མེད་སྲིན་བྱ་མྱ་ངན་ཁུང་བུར་ཡིབ། །མགོན་ཁྱོད་བརྩེ་ཆེན་ཆུ་ཁུར་རྔ་ཡབ་ལས། །ལེགས་བཤད་སྦྲང་ཆར་བྱིན་རླབས་འབྲུག་སྒྲ་ཅན། །སྐལ་ལྡན་ཞིང་སའི་དཔྱིད་དུ་ལྷུན་འཇོ་བས། །ས་འདི་སླར་ཡང་དགེ་ལེགས་མྱུ་གུས་ཁེབས། །ཁྱོད་ཞབས་པད་མོ་བཞད་པའི་ཕྱོགས་ཀུན་ཏུ། །སྐལ་བཟང་བུང་བ་གྲངས་ཀྱིས་མི་ཟིན་པས། །ཟབ་རྒྱས་ཆོས་ཚུལ་སྦྲང་རྩིའི་དོག་པ་ལ། །ཐོས་བརྩོན་མཆུ་ཡིས་བསྣུན་ལ་ལོང་ཡོད་སྤངས། །མཐའ་དག་འགྲོ་ཁམས་ཁྱུང་གི་སྔོན་སྐྱེས་མས། །ལེགས་དྲངས་ཁྱེད་གསུང་འོད་བརྒྱའི་དྲ་བ་ཅན། །རྒྱལ་བསྟན་ཆུ་སྐྱེས་ཚལ་དུ་འཕོས་པ་ན། །ལུས་མེད་གྲིབ་མ་ནག་པོའི་དཔུང་ཚོགས་བྱེར། །ཚོགས་གཉིས་ཤར་རིའི་ཕྲག་ཏུ་རྩེན་པ་ཡི། །གང་སྐུ་ཆུ་ཤེལ་དབང་པོའི་འོད་དཀར་ཕྲེང་། །ཚུར་མཐོང་ཆུ་བུར་མིག་གི་མཚོ་རྫིང་དུ། །མཚན་དཔེའི་དཀྱིལ་འཁོར་ཟླུམ་པའི་རོལ་གར་རྨད། །མདོ་སྨད་ལྷོ་བྱང་རྣམ་སད་སྐྱེད་ཚལ་དུ། །མཛད་བཟང་ས་སྲུང་དཀར་པོའི་སྟེང་འགྱིང་བའི། །ཟླ་བྲལ་མགོན་པོ་མཁྱེན་བརྩེའི་སྤྱན་སྟོང་ཅན། །བསྟན་འཛིན་ཚིགས་བཟང་བྱེ་བའི་བདག་པོར་བསྔགས། །འཇམ་མགོན་ལེགས་གསུང་འོད་དཀར་དྲ་བའི་རྒྱུན། །གདུལ་བྱ་སྐལ་བཟང་ཁྱེའུས་ཡོངས་གཞིབས་ཏེ། །བྱང་གྲོལ་ལུས་སྟོབས་དར་བའི་ངོ་མཚར་གྱིས། །མཐའ་དག་རྒྱལ་ཀུན་མཛད་འཕྲིན་བསྡུ་ལ་རིངས། །བསྐལ་མང་སྲིད་པའི་ཚང་ཚིང་འཇིགས་རུང་དབུས། །སྒྲིབ་གཉིས་ལྟོ་འགྲོ་གདུག་པས་ཡོངས་ཟིན་ཏེ། །རྣམ་གྲོལ་དམིགས་བུ་སྟོར་བའི་ལུས་ཅན་དག །སྐུ་གསུམ་གྲོང་དུ་འཁྲིད་པའི་ས་མཁན་ཁྱེད། །སྒོ་གསུམ་དྲི་བཅས་ཐེག་གསུམ་གདུལ་བྱའི་ཚོགས། །སྟོང་གཟུགས་གོ་འཕང་མཆོག་ལ་སྦྱོར་བྱེད་པའི། །རྒྱུད་ཀུན་ཡང་སྙིང་དཔལ་ལྡན་དུས་འཁོར་ལོའི། །ཆོས་ཆར་རིས་མེད་གདུལ་བྱའི་ཞིང་སར་ཕབ། །རིང་ནས་ཟུང་འཇུག་གདོད་མའི་སར་གཤེགས་ཀྱང་། །རྒྱལ་སྲས་དཔའ་བོའི་ཟློས་གར་ལེགས་བསྒྱུར་ཏེ། །ཕྱིན་དྲུག་དཔག་བསམ་ལྗོན་པའི་འབྲས་བཟང་གིས། །སྐལ་བཟང་རེ་བའི་སྙིམ་པ་ལྕི་བར་མཛད། །ཐེག་གསུམ་ངེས་འབྱུང་སེམས་ཀྱི་ནོར་འཛིན་ལྟོར། །སྡོམ་གསུམ་མྱུ་གུའི་ནགས་ཀློང་ཡོངས་དཀྲིགས་ཏེ། །སྐུ་གསུམ་གཡུར་ཟའི་འབྲས་བུ་སྨིན་མཛད་པའི། །གསང་གསུམ་ཕ་མཐའ་དམིགས་ལ་རྒྱལ་ཀུན་ཚོམ། །རྣམ༷་དག༷་ཁྲིམ༷ས་ཀྱི་སྒྲོ་ཐུལ་རབ་མཛེས་ཤིང་། །ལུང་རིགས་དབྱངས་ལྡན༷་སྡོམ་བརྩོན་ངང་པའི་ཁྱུ། །མདོ་སྔགས་པད་རྩའི་རོ་ལ་ལོངས་སྤྱོད་པའི། །འོག་མིན་གཉིས་པའི་གླིང༷་འདི་ཁྱོད་ཀྱིས་བསྐྲུན། །ཕྱི་རུ་གྲྭ་ཤག་ཨུཏྤལ་དཀར་པོའི་ཚལ། །ནང་བཅུད་རིག་གྲོལ་འདུས་ཚོགས་བུང་བའི་ཁྱུ། །ཁྱོན་ཡོན་དབྱར་གྱི་དཔལ་མོས་ཡོངས་བསྐྱངས་པས། །ཐར་འདོད་ཐ༷ར་པར་གཤེགས་པའི་ཤུལ༷་ལམ་ཉིད། །འཕགས་ཚོགས་འདུས་སྡེ་བཤད་སྒྲུབ་ལོངས་ལ་རྩེན། །དཀར་ཕྱོགས་སྲུང་མས་ལས་བཞི་དུས་སུ་སྒྲུབ། །འབྱོར་ལྡན་བསྙེན་པའི་རླབས་ཕྲེང་མངོན་མཐོར་བརྩེགས། །ལྗོངས་འདིར་རྫོགས་ལྡན་སྣང་བ་ཁྱེད་ཀྱིས་བཀྱེས། །དགེ་ལེགས་འཛད་པ་མེད་པའི་མཆོད་སྦྱིན་གྱིས། །བགྲང་ཡས་གདུལ་བྱའི་རེ་བ་ཡོངས་སྐོང་བ། །མགོན་ཁྱོད་དཔག་བསམ་ལྗོན་པའི་གྲིབ་བསིལ་དུ། །བྱིན་རླབས་འབྲས་བཟང་སྤྱོད་པའི་སྐལ་བ་སྦོམ། །ཐོག་མར་སྡོམ་གསུམ་ཐར་པའི་གྲོང་དུ་ཁྲིད། །བར་དུ་ལེགས་བཤད་འཆི་མེད་བདུད་རྩིས་བསྐྱངས། །ཐ་མར་རྣམ་གྲོལ་མཛོད་ཀྱི་ལྡེ་མིག་གཏད། །མགོན་ཁྱོད་བཀའ་དྲིན་རྡུལ་ཙམ་ཇི་ལྟར་གཞལ། །འཇ༷མ་དཔལ་ཟུར་ཕུད་བྱི་བའི་རོལ་རྩེད་ཀྱིས། །དབྱང༷ས་ཅན་དགྱེས་བ༷ཞད་ལེགས་བཤད་དབྱངས་སྙན་ཅན། །བ༷ཀྲ་ཤིས༷་དགེ་ལེགས་མཚན་མ་གཡས་འཁྱིལ༷་སྡེར། །ཞབས་སྐྱེས་རི་མོ་འཕོས་པ༷འི་རྟོགས་བརྗོད་རྨད། །སྐལ༷་ལྡན༷་རྒྱ༷་མ༷ཚོའི་རལ་བའི་ནགས་ཀླུང་དུ། །རྣམ་དཔྱོད་མེ་ཏོག་འཛུམ་པའི་དཔལ་ཡོན་ཅན། །གང་དེས་བ༷དེ་ཆེ༷ན་ཆོས༷་འཁོར༷་ལན་བརྒྱ་རུ། །བསྐོར་པའི་གླིང༷་དུའང་ལེགས་བཤད་དགའ་སྟོན་བསྩལ། །ཆེ་རྒུའི་ཟུར་ཕུད་གངས་ཀྱི་ས་འཛིན་སྤོར། །ལུགས་གཉིས་གཡུ་རལ་གསིག་པའི་གདོང་ལྔའི་དབང་། །ལྰ༷་མོ༷འི་གོང་ཞབས་གདན་ས་ཟླ་མེད་པ། །བ༷དེ་སྟོང་གསང་ཆེ༷ན་ཚལ་དེ་ཁྱེད་ཀྱི་སྐྱོང་། །འཇམ་དབྱངས་མི་གཟུགས་ཞྭ་དམར་པཎཌི་ཏའི། །ཞབས་པད་མངོན་མཛེས་བཀྲ༷་ཤིས༷་ཆོས༷་ཀྱི་སྡེ། །མདོ་སྔགས་པད་མོའི་ལྡིང༷་ཁང་མངོན་དགའ་བར། །བློ་གསལ་རྐང་དྲུག་མཛད་བཟང་སྦྲང་རྩིས་བསྐྱངས། །ངེས་གསང་སྙིང་པོ་ཨ༷་ཡིག་ལང་ཚོའི་འཕྲུལ། །རི༷ག་གྲོལ་དགེ༷་བའི་བཤེས༷་ཀྱི་ཞི་བསིལ་ཚལ། །གང་དེར་ཞབས་སྐྱེས་བཀྲ༷་ཤིས༷་འཁོར་ལོའ་རྡུལ། །དགེ་ལེགས་ཀུན་འབྱུང༷་གནས༷་དེའི་བྱིན་དུ་ཆགས། །ལུགས་གཉིས་ཤེ་མོང་མཆེ་སྡེར་རྣོན་པོའི་གར། །མཐའ་བཞིའི་རྒྱལ་ཕྲན་རི་སྐྱེས་སྙེམས་པའི་མགོར། །གདེངས་མཛད་གནམ་བསྐོས་རྒྱ་ནག་ས་སྐྱོང་ཆེའི། །གསེར་གྱི་ཕོ་བྲང་ (པེ་ཅིན)ཆེ་ དེར་ཞབས་ཀྱིས་བཅགས། །རྒྱལ་ཀུན་ཡབ་གཅིག་འཇམ་དཔལ་དཔའ་བོ་ཡི། །གསང་གསུམ་སྒྱུ་མའི་རོལ་རྩེད་འབྱམས་ཀླས་པ། །ཚུར་མཐོང་ཆུ་བུར་མིག་གི་སྤྱོད་ཡུལ་དུ། །སྣང་བའི་གནས་(རི་བོ་རྩེ་ལྔ)དེར་ ཞབས་སྐྱེས་མེ་ཏོག་བཞད། །དེ་རུ་དད་གསུམ་སྙིམ་པའི་མེ་ཏོག་གིས། །ཞབས་ཟུང་སྲད་བུ་མཛེས་པའི་ལང་ཚོ་ཅན། །མགོན་ཁྱོད་དཀྱིལ་འཁོར་རྒྱ་མཚོའི་ཐིག་ལེ་རུ། །མངོན་བཞེངས་དག་པའི་རོལ་བ་འབྱམས་སུ་ཀླས། །ཁྱེད་ཀྱི་གྲགས་དཀར་སྤྲིན་གྱི་རོལ་མོའི་དབྱངས། །ཐ་དད་རིགས་ཀྱི་མདོང་མཐའ་འབུམ་ཕྲག་གི །དང་བའི་ཐོས་འཛིན་དཔལ་དུ་ཉེར་མཆེད་པས། །འཕྲིན་ལས་དབྱར་མཚོའི་རླབས་ཕྲེང་སྲིད་རྩེར་ལུད། །མགོན་ཁྱེད་གསང་གསུམ་འབྱམས་སུ་ཀླས་པའི་གར། །གཞོམ་མེད་རྡོ་རྗེའི་ལང་ཚོར་ཡོངས་སྨིན་ཏེ། །བདག་སོགས་གདུལ་བྱ་རྒྱ་མཚོའི་དཔུང་གཉེན་དུ། །རྡུལ་སྙེད་བསྐལ་པར་ཆོས་འཁོར་བསྐོར་བར་བསྐུལ། །རྒྱལ་བསྟན་སྣང་བ་ཆེ་ཆེར་ཕྲ་བ་ཡི། །རྒུད་ཚོགས་མི་བཟད་ལྔ་བདོའི་དབང་ཕྱོགས་མཁའ། །ཁྱོད་ཡོན་ཉིན་བྱེད་འོད་ཀྱིས་འཁྱུད་པ་ན། །ཡིད་སྲུབ་རྒྱུ་སྐར་འོད་ཚོགས་སྟོང་དབྱིངས་བྲོས། །ཕྱི་རུ་གསུམ་ལྡན་ངུར་སྨྲིག་འཛིན་པའི་གར། །ནང་དུ་རིམ་གཉིས་ཟུང་འཇུག་རྣལ་འབྱོར་སྤྱོད། །གསང་བ་དཀྱིལ་འཁོར་རྒྱ་མཚོ་སྤྲོ་བསྡུའི་བདག །ཁྱབ་བདག་བླ་མའི་མཛད་པ་འབྱམས་སུ་ཀླས། །ཟླ་ཤེལ་ལང་ཚོས་སྒེག་པའི་སྨན་ལྗོངས་འདི། །མགོན་ཁྱོད་འཕྲིན་ལས་ཉི་འོད་ཀྱིས་འཁྱུད་ཚེ། །རྒྱལ་བསྟན་པུཎཌ་རི་ཀའི་འཛུམ་དཀར་ལ། །ཕྲག་དོག་ལུས་མེད་ཀུན་དའི་མྱ་ངན་ལྕི། །བསིལ་ལྗོངས་ལྔ་རིག་དྲི་བྲལ་འོ་མའི་མཚོར། །ཁྱོད་ཀྱི་མཛད་བཟང་ཟླ་འོད་ཕོག་པ་ན། །རིག་བྱེད་རླབས་དཀར་འཕྱུར་བའི་ཟེགས་མ་ཡིས། །རྫོགས་ལྡན་སྤྲིན་གྱི་འདུ་འགོད་འགོག་ལ་བརྩོན། །

རྗེ་ཉིད་དགུང་གྲངས་དགུ་བཅུ་གོ་གྲངས་ནང་ཕེབས་དུས་ཀྱི་སྐུ་པར།
འཇམ་མགོན་རྒྱལ་ཚབ་ཁྲི་ རབས་རིམ་བྱོན་དང་། །ལྔ་རིག་མཛོད་ལ་དབང་སྒྱུར་པཎཌི་ཏ། །སྙན་བརྒྱུད་གདམས་པའི་བཀའ་བབ་བསྟན་འཛིན་ཚོགས། །མགོན་ཁྱོད་གདུལ་བྱར་མ་གྱུར་འགའ་ཡང་མེད། །ཁྱེད་གསུང་ལེགས་བཤད་སྦྲང་རྩི་མངར་བོ་ཡིས། །རྣམ་དཔྱོད་ལུས་བརྟས་སྐལ་བཟང་བུང་བའི་ཚོགས། །ཐུབ་བསྟན་ལི་ཤི་དཀར་པོའི་སྐྱེད་ཚལ་དུ། །བཤད་སྒྲུབ་འདབ་གཤོག་སྒྱུར་བར་ཅི་ཡང་བྲེལ། །ཐུབ་བསྟན་གླིང་བཞི་ལ་དབང་འཁོར་ལོས་སྒྱུར། །བྱང་གྲོལ་རིན་ཆེན་སྩོལ་མཛད་དེད་དཔོན་ཆེ། །ལྔ་རིག་ཤེས་བྱ་ཀུན་གཟིགས་པཎཌི་ཏ། །བདུད་བཞིའི་གཡུལ་ལས་རྒྱལ་བའི་དཔའ་བོའི་མཆོག །མགོན་ཁྱོད་སྐུ་གསུང་ཐུགས་ཡོན་དབྱར་སྐྱེས་ལྔ། །དད་གསུམ་སྒྲ་འཛིན་བཅུད་དུ་ཡོངས་སྨིན་ཏེ། །རེ་བའི་མིག་འབུར་མཐོ་བའི་མགྲིན་སྔོན་ཁྱུའི། །གདུང་སེལ་དབྱར་སྐྱེས་སྔོན་པོའི་རོལ་བ་རྨད། །མཁྱེན་རབ་བཅུ་དྲུག་དཀྱིལ་འཁོར་ཡོངས་རྫོགས་ཤིང་། །བརྩེ་ཆེན་འོད་དཀར་དྲ་བའི་འཇོ་སྒེག་ཅན། །ནུས་སྟོབས་རླུང་གི་ཤིང་རྟའི་འཕྲུལ་འཁོར་གྱིས། །ཐུབ་བསྟན་མཁར་འཕགས་སྨྲ་བའི་ཟླ་བ་རྒྱལ། །ལྟ་ངན་ཝ་སྐྱེས་སྙིང་གི་ས་འཛིན་སྤོར། །ལུང་རིགས་མཆེ་སྡར་གནམ་ལྕགས་མཚོན་བསྙིལ་ཏེ། །ཀུན་རྨོངས་དོན་སྙིང་རྡུལ་ཕྲན་སར་འགོད་པའི། །འཇམ་མགོན་གངས་རིའི་གདོང་ལྔ་ཁྱེད་མིན་སུ། །ལུང་རྟོགས་ཡོན་ཏན་ཉི་ཟླའི་རྣ་ཆ་གཡོ། །བསྟན་འཛིན་གསེར་རིའི་ཕྲེང་བས་ཡོངས་སུ་བསྐོར། །ཚོགས་གཉིས་འཛིན་མར་བརྗིད་པའི་རི་དབང་ཆེ། །འཇིག་བྲལ་རྟག་བཞུགས་གསོལ་འདེབས་དབྱངས་སུ་ལེན། །ལྟ་ངན་ཆུ་སྤྲིན་ཀྱ་ཀྱུར་དཀྲིགས་པའི་དཔུང་། །ཐུབ་བསྟན་ཉི་འོད་སྲོག་ལ་གཟན་གྱུར་པའི། །དུས་འདིར་འཕྲིན་ལས་རྣམ་བཞིའི་འཐོར་རླུང་གིས། །རྒུད་ཚོགས་དབྱིངས་སུ་སྟིམ་བཞིན་བཞུགས་སུ་གསོལ། །ལྔ་བདོའི་མེ་ལྕེ་ཐུབ་བསྟན་ནགས་ཀླུང་དུ།ན །འཛེམ་མེད་མཆེད་འི་གཉེན་པོར་རབ་བསྔགས་པའི། །མཛད་འཕྲིན་སྤྲིན་གྱི་མེ་ཏོག་ཕང་ཕུང་ཅན། །གདུང་སེལ་ཆུ་འཛིན་དཀར་པོའི་ངོ་བོར་བཞུགས། །འཛམ་གླིང་ནོར་འཛིན་ཨུཏྤལ་དཀར་པོའི་ནགས། །ཐུབ་བསྟན་སྦྲང་རྩིའི་མཛོད་དུ་སྨིན་པ་ཡི། །ཡང་དར་དབྱར་གྱི་དཔལ་མོའི་མཛེས་རྒྱན་དུ། །གསང་གསུམ་མུ་ཏིག་དཀར་པོའི་རྒྱན་དུ་བཞུགས། །བརྗོད་བྱ་དགེ་ལེགས་ནམ་མཁའ་མཛོད་ཀྱི་སྒོ། །རྗོད་བྱེད་སྙན་ཚིག་དབྱར་སྐྱེས་སྙན་འཇེབས་གླུ། །དད་གསུམ་སྦྲང་ཆར་སྣུམ་པོའི་རྩེ་དགའ་ཅན། །ཚོགས་གཉིས་གཡུ་ལོ་དཀྲིགས་པའི་ཞིང་དུ་གཏིབས། །སྐུ་བཞི་ནོར་བུའི་གླིང་དུ་བགྲོད་པའི་གྲུ། །མཆོག་གསུམ་བྱིན་རླབས་དཀྲིགས་པའི་དཀྱིལ་འཁོར་བདག །རིམ་གཉིས་རྣལ་འབྱོར་མཐར་ཕྱིན་གྲུབ་བརྒྱའི་མགོན། །སྐྱབས་གཅིག་བླ་མའི་གསུང་གསུམ་ནམ་མཁའི་མཐའ། །ཚུར་མཐོང་བློ་གྲོས་བྱེའུའི་གཤོག་གུར་གྱིས། །གཞལ་བར་མི་སྤྱོད་ན་ཡང་དད་གུས་ཀྱི། །ཀུ་ཤའི་རྩེ་རུ་དྲངས་པའི་ཐིགས་པ་འདི། །སྐལ་ལྡན་དང་བའི་གསོས་སུ་འགྱུར་རམ་སྙམ། །རབ་བྱེད་འདིས་མཚོན་དུས་གསུམ་དགེ་བའི་ཚོགས། །རྒྱལ་སྲས་དཔའ་བོའི་རླབས་ཆེན་སྨོན་ལམ་དང་། །ཡོངས་འདྲེས་ཁྱབ་བདག་རྗེ་བཙུན་བླ་མ་ཡི། །གསང་གསུམ་རྡོ་རྗེའི་གཤིས་སུ་བརྟན་ཕྱིར་བསྔོ། །ཞེས་པ་འདི་ནི་ཁྱབ་བདག་འཁོར་ལོའི་མགོན་པོ། དུས་ཀྱི་མཐའ་འདིར་རྒྱལ་བའི་བསྟན་ལ་རྒྱལ་བ་གཉིས་པ་ལྟ་བུར་བཞུགས་པའི་དྲིན་ཅན་ རྩ་བའི་བླ་མ་མཚན་བརྗོད་པར་དཀའ་བ། དོན་གྱི་སླད་དུ་མཚན་ནས་བརྗོད་ན་༧ལྰ་མོའི་ཡོངས་འཛིན་རྡོ་རྗེ་འཆང་རྗེ་བཙུན་ བློ་བཟང་མཁས་གྲུབ་རྒྱ་མཚོ་ཞེས་ས་གསུམ་གྱི་འདྲེན་པ་དམ་པར་གྱུར་པ་གང་གིས་ བགྲང་བྱ་བཅུ་ཕྲག་གཅིག་ལྷག་གི་རིང་ཡི་གེ་དབུ་ཅན་དབུ་མེད་འབྲི་སྟངས་ནས་རྒྱུད་ སྡེ་བླ་མེད་ཀྱི་དབང་སྐུར་བར་་ཆོས་དང་ཟང་ཟིང་གཉིས་ཀས་བུ་ལྟར་བསྐྱངས་པའི་ སློབ་བུ་ཐ་ཤལ་བ། གདོལ་སྤྱོད་ངག་དབང་བསྟན་ཡེ་ཤེས་རྒྱ་མཚོའམ། ཡོངས་གྲགས་ཀྱི་སྨྱུག་མིང་ཀླུ་སྨྱོན་ཧེ་རུ་ཀར་འབོད་པ་དེས། རྗེ་བཙུན་བླ་མ་མཆོག་གི་རྟོགས་པ་བརྗོད་པའི་སྙན་ངག་འདི་ས་གསུམ་ན་འགྲན་ཟླ་བྲལ་ བའི་གནས་མཆོག་ལུམྦྷི་ནིར་འབྲི་མགོ་བཙུགས་ཤིང་། གནས་ཆེན་མཆོད་རྟེན་བྱ་རུང་ཁ་ཤོར་གྱི་འདབས་རོལ་ཏུ་མཇུག་ཡོངས་སུ་གྲུབ་པར་ བགྱིས་པ་དང་། སྣོད་བཅུད་མཐའ་དག་གིས་མི་རྟག་སྒྱུ་མའི་རང་མདངས་ངོམ་པའི་ཀློང་དུ། ཚུར་མཐོང་གདུལ་བྱའིི་སྣང་ངོར་རྗེ་བླ་མ་མཆོག་ཀྱང་རེ་ཞིག་ཞིང་འདིའི་གདུལ་བྱ་ རྟག་འཛིན་ཅན་ཁོ་བོ་ལྟ་བུ་དག་གི་བློ་ཁ་ཆོས་ལ་སྐུལ་ཕྱིར་སྐུའི་མཆོད་སྡོང་རེ་ ཞིག་མི་ཡུལ་འདིར་བཞག་གནང་སྟེ་དག་པའི་ཞིང་ཁམས་འབྱམས་སུ་ཀླས་པར་ཕེབས་བཞུད་ ཐེངས་ཤིག་གནང་རྗེས། ཡང་སྐྱར་ཐུབ་པའི་བསྟན་པ་སྤྱི་སྒེར་དག་ལ་སྨན་ཕྱིར་དང་འགྲོ་བའི་སྡུག་བསྔལ་ གཏོས་དྲག་པོ་དག་སེལ་ཕྱིར་ཡང་སྲིད་ཉི་མ་གཞོན་ནུ་སྐྱེ་རྒུའི་བསོད་ནམས་ཀྱི་ཤར་ རིའི་ཕྲག་ནས་མངོན་པར་རྩེན་པའི་དུས་འདིར། རྗེ་བླ་མ་མཆོག་ལ་རྗེས་དྲན་ཞིག་གི་ཚུལ་དུ་སྙན་ངག་འདི་གློག་ཀླད་དུ་གཏགས་ཏེ་ དྲ་ལམ་དུ་བཞག་པ་ལགས།། །།

ཟིན་བྲིས་ཀྱི་སྡེ་ཚན

ཚོལ་གཤེར

དྲ་ངོས་བཀླགས་གྲངས།

བཀླགས་གྲངས་མང་ཤོས

ཡིག་ཚགས

རྟག་བརྟན་གྱི་སྙན་ཚིག

About Me

སྙན་ངག་གི་ལམ་དུ་དྲངས་པའི་རྟོགས་བརྗོད་སྤྲིན་གྱི་མེ་ཏོག

0 བསམ་ཚུལ་འདོན་པ།:

Post a Comment