དགུ་བཅུ་གོ་གྲངས་དུས་རབས་དེར།
ལྟོས་ས་ལྟོས་འཇོག་གིས་བརྗོད་ན།
གྲྭ་པའི་དུས་རབས་འབོད་ཆོག་ཆོག
རི་གྲོང་གང་སར་གྲྭ་པས་ཁེངས།
ཕྱུག་པོས་གཅེས་ཕྲུག་གྲྭ་པ་བཟོ།
དབུལ་བོས་ཕྲུ་གུ་དགོན་པར་སྐྱེལ།
དེ་དུས་གྲྭ་པར་ཆོག་ཤེས་ཡོད།
དེ་དུས་གྲྭ་པར་བརྩི་བཀུར་ལྡན།
དེ་དུས་གྲྭ་པར་བླ་མ་ཡོད།
དེ་དུས་གྲྭ་པར་སློབ་དཔོན་ཡོད།
དེ་དུས་གྲྭ་པར་སྡོམ་པ་ཡོད།
དེ་དུས་དགོན་པར་ཆོས་སྒྲ་སྙན།
དེ་དུས་ཆོས་གྲྭར་རྩོད་རླབས་འཕྱུར།
དེ་དུས་གྲྭ་པར་ཆོས་གོས་ཡོད།
སྟོང་ལོ་ཚེས་དང་མ་ཚེས་བར།
དུས་རབས་འཁོར་ཤུགས་མགྱོགས་སུ་ཕྱིན།
གསར་རྙིང་གཙུབ་བརྡར་དྲག་ཏུ་འབར།
གྲྭ་རྒན་མང་པོ་དགོངས་པ་རྫོགས།
གྲྭ་གཞོན་དུ་མ་སྐྱ་སར་བབས།
དེ་ཡང་འབབ་སྟངས་མི་འདྲ་སྟེ།
ལ་ལ་གྲོང་ཁྱེར་ཆེན་པོར་བབས།
ལ་ལ་དབུས་ལམ་རིང་མོར་བབས།
ལ་ལ་ཉི་མ་ལྷ་སར་བབས།
ལ་ལ་བལ་བོད་མཚམས་ནས་བབས།
ལ་ལ་བལ་བོའི་རྒྱལ་སར་བབས།
ལ་ལ་མན་ཇུ་ཀྲི་ལར་བབས།
ལ་ལ་མེག་ལོར་གན་ཇིར་བབས།
ལ་ལ་རྒྱ་གར་ལྷོ་ཕྱོགས་བབས།
ལ་ལ་ཀ་རྡོར་སྒང་གསུམ་བབས།
ལ་ལ་ལ་དྭགས་ཀླེ་རུ་བབས།
ལ་ལ་ཉིག་ཡོར་གྲོང་ནས་བབས།
ལ་ལ་ཁེ་ན་སྒྲ་རུ་བབས།
ལ་ལ་ཡོ་རོབ་གླིང་དུ་བབས།
ལ་ལས་མེ་ཏོག་མ་ལ་རྒྱོས།
ལ་ལའི་ཚེ་གཅིག་འདོད་དོན་འགྲུབ།
ལ་ལས་ཉི་ཤུའི་བུ་མོར་རྒྱོས།
ལ་ལའི་སྣང་བ་སྤྲིན་དང་འདྲེས།
ལ་ལས་སུམ་ཅུའི་དར་མར་རྒྱོས།
ལ་ལ་ཤ་སྐམ་པགས་སྐམ་ཆགས།
ལ་ལས་ལྔ་བཅུའི་རྒན་མོར་རྒྱོས།
ལ་ལའི་འགྱོད་པ་རྟས་མ་ཟིན།
ལ་ལ་ཆུང་མ་བཙན་པོར་ཐུག
མི་ཚེ་ཧྲིལ་བོ་སྡུག་ལ་འབྱར།
ལ་ལ་ཚེ་གྲོགས་མཛེས་མར་ཕྲད།
སྐྱིད་སྡུག་གཉིས་ཀ་རེས་མར་འཁོར།
ལ་ལ་མི་ཚེར་མི་རྐྱང་ལུས།
ཁ་ཤ་ཉ་ཤ་གཉིས་ཀ་ཤོར།
ལ་ལས་གྲྭ་ས་ཆེན་པོ་དྲན།
གྲྭ་སའི་ཐུག་པ་ཞིམ་པོ་དྲན།
ལ་ལས་དབེན་དགོན་ཆུང་ཆུང་དྲན།
དབེན་པའི་ལྷིང་འཇགས་འཚོ་བ་དྲན།
སྟོང་ལོ་གསར་པའི་ནང་རོལ་ཏུ།
སྤྱི་ཚོགས་འཚོ་བ་ཡར་རྒྱས་ཕྱིན།
འཆར་ལྡན་བུ་སྐྱེ་ལག་ཏུ་བླངས།
ཁྱིམ་རེར་བུ་དང་བུ་མོ་རེ།
བུ་གཅིག་སུ་ཡིས་གྲྭ་པ་བྱེད།
གྲྭ་པའི་མི་ཚེར་སྐྱིད་མ་ཚོར།
གྲྭ་པའི་ཤེས་ཡོན་ཡིད་མ་ཚིམས།
གྲྭ་པ་བྱེད་མཁན་ཉུང་དུ་ཕྱིན།
གྲྭ་ས་ཆེན་པོར་གྲྭ་རྒྱུན་དཀོན།
གདན་ས་ཆེན་པོར་སྦྱིན་བདག་ཉུང་།
བླ་ཆེན་མང་ཞིག་དགོངས་པ་རྫོགས།
བླ་ཆུང་མང་པོ་སྐྱ་སར་བབས།
བསྟན་པའི་སྦྱིན་བདག་རྒྱ་མོར་བཅོལ།
རྒྱ་མོའི་བརླ་ཤ་འཇམ་ན་ཡང་།
རྒྱ་མོའི་ཀླད་པ་ཚོང་ལ་མཁས།
ཕར་ལ་རྒྱ་སྒོར་བསླངས་པ་ན།
ཚུར་ལ་བོད་མཇེ་སློང་བར་གོམས།
དགོན་ཆུང་མང་ཞིག་སྒོ་ཡང་བརྒྱབ།
སྟོན་པ་གཤེགས་ནས་ཕྱིར་འོང་མེད།
གཏད་རབས་བདུན་ཡང་གར་སོང་མེད།
གནས་བརྟན་བཅུ་དྲུག་ཞལ་འདོན་ཙམ།
རྒྱལ་ཆེན་བཞི་ནི་ལྡེབས་རིས་ཉིད།
གྲྭ་པས་བསྟན་པ་འཛིན་དགོས་ན།
ད་ནི་བསྟན་པ་མཐའ་ལ་ཐུག
ད་ནི་བསྟན་འཛིན་གྲངས་ཀ་ཉུང་།
ད་ནི་མི་སེམས་སྒོར་གྱིས་བསླུས།
ད་ནི་ལྷ་ཁང་གསེར་གྱིས་བཞེངས།
ད་ནི་བསླབ་པར་ཐལ་རྡུལ་བབས།
ད་ནི་སྟོན་པར་སྤྱན་ཆབ་འཁོར།
ད་ནི་ཉན་ཐོས་ངུ་ཞིང་བརྒྱལ།
ད་ནི་སྙིགས་མུན་དྲག་ཏུ་འཐིབས།
ད་ནི་དམ་སྲིའི་དཔུང་ཚོགས་རྒྱས།
ད་ནི་ཆོས་པ་ཉུང་དུ་ཕྱིན།
ད་ནི་མཁས་པ་གཉིད་དུ་ཡུར།
ད་ནི་དེ་ཙམ་ཆོག་པར་བྱ
སྟོན་པ། ངའི་གཟན་སྣེ་མེ་རུ་འབར་སོང་། ཁྱོད་འཇིག་རྟེན་དུ་བཞུགས་དུས། གྲྭ་པ་རེ་རེའི་གཟན་སྣེ་རུ་ཞི་བདེའི་རླུང...
0 བསམ་ཚུལ་འདོན་པ།:
Post a Comment