ཚོལ་གཤེར

དྲ་ངོས་བཀླགས་གྲངས།

བཀླགས་གྲངས་མང་ཤོས


དྲ་རྒྱ་བཟོ་བཀོད་པ་བསོད་ནམས་འོད་ཟེར།

རྟག་བརྟན་གྱི་སྙན་ཚིག

—མཛའ་བོའི་དུས་ཆེན་ལ་ཕུལ་བའི་ཤིས་ཚིག
སྟག་ཤར་གཞོན་པའི་བྲང་གི་ཤ་རྒོད་དང་། །
སྨན་ཆུང་བུ་མོའི་བྲང་གི་མྱོས་བུམ་གཉིས། །
འཇིག་རྟེན་སྣང་བས་གཅིག་ཏུ་འདྲེས་པ་ཡི། །
མཛའ་བོའི་དུས་ཆེན་བསྐལ་པའི་མཐར་ཡང་དྲན། །
གསེར་གྱི་རྣ་རྒྱན་ཐག་པ་མི་འཆད་ཅིང་། །
དངུལ་དཀར་མཛུབ་དཀྲིས་ས་རུ་མི་ལྷུང་བར། །
འདོད་ལྡན་ཕོ་མོའི་འདོམ་གྱི་སྦྲང་རྩི་ཡི། །
རོ་མངར་སྐྱེ་བོ་ཀུན་གྱིས་མྱོང་བར་ཤོག །
གློག་སྒྲོན་དམར་པོའི་འོད་སྣང་ཟ་ཟིའི་ངོགས། །
དཀར་འཇམ་མལ་གྱི་སྟེགས་བུ་འབོལ་ཞིང་བདེ། །
དེ་སྟེང་ངོ་ཚའི་གོས་ནས་ཡོངས་བྲལ་ནས། །
འདོད་པའི་དགའ་སྟོན་མྱོང་བའི་སྨོན་འདུན་ཞུ། །
ཕན་ཚུན་འདོད་པའི་མིག་གིས་ཡོན་པོར་ལྟ། །
ཕན་ཚུན་ཆགས་པའི་དབུགས་ཐག་ཐུང་ངུར་ལེན། །
ཕན་ཚུན་དྲག་ཏུ་བསྣུན་ཅིང་གཏོད་པ་ཡི། །
ངོ་མཚར་འདོད་པའི་གར་གྱིས་འཚོ་བར་ཤོག །

མི་རྣམས་དྲག་པོའི་མཚོན་ཆ་སྣ་ཚོགས་པ། །
མཛའ་གྲོགས་འབུལ་བའི་མེ་ཏོག་ཉིད་གྱུར་ཅིང་། །
ཚིག་རྩུབ་མཚོན་ཆ་སྙིང་ལ་འཛེར་བའི་ཚོགས། །
འདོད་པས་མྱོས་པའི་གླུ་རུ་འགྱུར་བར་ཤོག །
མི་རྣམས་ཞེ་སྡང་སྦྲུལ་གྱི་དུག་ལྕེ་དག །
བརྩེ་བའི་རལ་གྲི་རྣོན་པོས་འབྲེག་པ་དང་། །
ཕན་ཚུན་སྙིང་གི་མཛའ་བོ་མཛའ་མོ་བཞིན། །
འཁྱུད་ཅིང་འོ་ཡི་སྦྱོར་བས་འཚོ་བར་ཤོག །
Powered by Blogger.

About Me

My photo
མི་ཚེ་འཁྱོལ་ཙམ། ཡིག་ངོ་ཆོད་ཙམ། རྡོག་ལམ་མཐོང་ཙམ། ཤི་མ་གསོན་ཙམ།
Saturday 7 July 2012
ནམ་མཁའ་སྔོ་ཞིང་ཉི་འོད་ས་ལ་ཟགས། །
བྱ་བྱེའུའི་སྐད་ཅོར་རྨི་ལམ་ཀློང་ནས་ཐོས། །
བསིལ་རླུང་ཁྲོད་དུ་མཛེས་མའི་ལུས་དྲི་མཆེད། །
སྤྲིན་པ་རབ་རིབ་རི་བོའི་ཐོད་དུ་ལྷུང་། །


གྲོང་གསེབ་ཐར་ཐོར་བྱ་ཕོའི་གླུ་དབྱངས་ཁྱབ། །
བ་ལང་བག་ཡངས་ཞིང་ཚིགས་བར་དུ་རྒྱུ། །
འབྲས་ཞིང་སྙེ་མའི་མགོ་བོ་ལྕི་ཞིང་ལྡེམ། །
མགོ་དཀྲིས་ལྗང་སེར་མཐོང་ཙམ་ཡལ་ཙམ་བྱེད། །





རྒྱུགས་ཆུ་ཕྲ་མོའི་འོད་ཀྱིས་མིག་ཀྱང་ཟུམ། །
འདམ་རྩྭ་རིང་པོའི་གཞུང་རྟ་སྦོམ་ཞིང་མཉེན། །
སྦལ་བའི་ཕྲུ་གུ་ཁྱུ་གཅིག་ན་འདམ་སྙེག །
ངང་པ་རེ་ཟུང་རི་མོར་བྲིས་བཞིན་སྡོད། །

ལྗོན་པའི་བསིལ་གྲིབ་རྒན་རྒོན་མིག་མངས་རྩེད། །
མཐའ་སྐོར་བྱིས་པའི་ངོ་གདོང་དྲེགས་པས་འཚོས། །
ཁྱིུ་ཕྲུག་ཆུང་ཆུང་ངལ་མེད་འགྲེ་ལྡོག་བྱེད། །
ཉི་འོད་ཚ་བས་མིག་ཀྱང་ཟུམ་པར་བྱེད། །

སྒེག་མོའི་ཁྲུས་རས་ལྗོན་པའི་ཡལ་གར་དཔྱངས། །
མཛེས་པའི་ལུས་པོ་ཆུ་ནང་ཕྱེད་ཙམ་མངོན། །
ནུ་འབུར་སེན་རྗེས་དམར་པོས་ཡོངས་སུ་ཁེངས། །
སྐྲ་ལོ་ཉི་འོད་འབར་བས་གདོང་ཕྱེད་བཀབ། །

མེ་ཏོག་དམར་པོ་ཆུ་མོའི་གཞུང་དུ་ཁྱེར། །
ཕ་བོང་ཆུང་ཆུང་དག་ལ་གཡས་སྐོར་བྱེད། །
རྒྱང་རིང་རི་བོའི་ཕག་ནས་དུ་ཞགས་མཆེད། །
ཉི་དམར་ནུབ་མཁར་སྤྲིན་གྱི་རྒྱ་མཚོར་ལྷུང་། །

0 བསམ་ཚུལ་འདོན་པ།:

Post a Comment