བཀླགས་གྲངས་མང་ཤོས
-
ཆུ་མོ་གངྒྰ་ཤག་ཤག་རྒྱུ་བའི་དུས། ། སྟོན་ལོ་སེར་པོ་ལྷབ་ལྷུབ་འཕུར་བའི་དུས། ། གནམ་སྔོན་སྤྲིན་པ་རླུང་གིས་གཡོ་བའི་དུས། ། བ་གླང་ཁྱུ་ཞིག...
-
སྟོན་པ། ངའི་གཟན་སྣེ་མེ་རུ་འབར་སོང་། ཁྱོད་འཇིག་རྟེན་དུ་བཞུགས་དུས། གྲྭ་པ་རེ་རེའི་གཟན་སྣེ་རུ་ཞི་བདེའི་རླུང... -
མདང་དགོང་རྨི་ལམ་ཟ་ཟི་མང་ ཡང་ཁྱད་མཚར་བོ་ཞིག་ནི་དགོན་ཆེན་ཞིག་ས་འོག་ཏུ་ནུབ་བསྡད་ཡོད་ཅིང་། དགོན་བདག་བླ་མའི་ཞལ་རས་ལ་སྐྱོ་གཉེར་དགུ་བརྩེགས་ཤིག་བ...
-
ཨ་ རིར་ འབྱོར་ ནས་ ལོ་ མང་ སོང་ བ་ དང་ ། ། ཕན་ མི་ ཐོགས་ པའི་ ངོ་ ཤེས་ འགའ་ ཡང་ ཡོད། ། ད་ ནི་ སྒྲོ་ ལོར་ ལྗང་ ཁུ་ གསོག་ དུས་ འདིར། ། སོ...
-
མདང་དགོང་རྨི་ལམ་ཅུང་ཟད་ ཉུང་ཞིང་ད་ལྟ་དྲན་ཡུལ་དུ་གཅིག་ཀྱང་མི་འདུག ཆུ་ཚོད་བརྒྱད་པ་ཙམ་ལ་གཉིད་ལས་སད་བྱུང་། ཁྲུས་ཁང་གི་སྒེའུ་ཁུང་ལས་མཁའ་དབྱིང...
དྲ་རྒྱ་བཟོ་བཀོད་པ་བསོད་ནམས་འོད་ཟེར།
About Me
- སྨྱོན་པའི་འཇིག་རྟེན།
- མི་ཚེ་འཁྱོལ་ཙམ། ཡིག་ངོ་ཆོད་ཙམ། རྡོག་ལམ་མཐོང་ཙམ། ཤི་མ་གསོན་ཙམ།
Sunday, 25 September 2011
སྟོན་མཇུག་འདིར།
རླུང་བུ་ཤུར་ཤུར་དུ་ལྡང་ཞིང་།
སྤྲིན་པ་དག་ཀྱང་ནམ་མཁའི་ངོས་སུ་མགྱོགས་པོར་བཞུད་ཀྱིན་འདུག
སྟོན་མཇུག་ཁོ་ནར་བཞད་པའི་མེ་ཏོག་སེར་པོ་དེ་དག
རྩྭ་སྐྱའི་གསེབ་ན་དབྱར་དུས་ཀྱི་དཔང་རྟགས་ཙམ་ཞིག་ཏུ་མངོན།
མི་རྣམས་ལས་ཀར་བྲེལ་དྲགས་པས།
དབྱར་དུས་ཇི་ལྟར་བཞུད་པ་དང་།
སྟོན་ཁ་ཇི་ལྟར་བསླེབས་པ་ཡང་མ་ཤེས།
ད་ནི་སྟོན་ཁའི་ལོ་མ་སེར་པོ་དག་གི་དུས་ཚིགས་གང་མགྱོགས་བསླེབ་ངེས་རེད་ཨང་།
སྙན་ངག་ཅིག་འབྲི་བསམས་དུས།
ལག་པ་འདི་རང་དབང་མེད་པར་རང་གི་ཨ་རར་ཐོགས་འགྲོ་བ་དང་།
ལོ་རྒས་ཀྱིན་ཨ་ར་དག་ཀྱང་ཇེ་རྩུབ་ཡིན་པ་འདི་ཡིས།
ལོ་རྒས་ཀྱིན་མིའི་གཤིས་རྒྱུད་ཀྱང་ཇེ་རྩུབ་ཏུ་འགྲོ་བའི་སྣང་བ་ཞིག་ཀྱང་སྐྱེས།
མེ་འཁོར་ཞིག་ཐག་རིང་ན་དུང་བརྡ་སྒྲོག་བཞིན་ངར་ཤུགས་ཀྱིས་བཞུད་འགྲོ་དང་།
སྒེའུ་ཁུང་ཕྱི་ལོགས་སུ་ཁྱི་དཀར་པོ་ཞིག་དང་མཉམ་དུ་སྐྲ་ལོ་རླུང་གིས་སྐྱོད་བཞིན་པའི་བུ་མོ་དེའི་རྒྱབ་གཟུགས་ཁོ་ནས།
ད་གཟོད་འཇིག་རྟེན་འདིར་སྟོན་ཁ་བསླེབས་སྔ་བ་དང་།
ལོ་འགའི་སྔོན་གྱི་བྱིས་པ་དམར་འབྱར་དེ་དག་ཀྱང་ད་ནི་སློབ་གྲྭར་འགྲོ་བཞིན་ཡོད་ཅིང་།
དགེ་རྒན་ཚོའི་མིག་ཤེལ་དག་ཇེ་མཐུག་ཏུ་ཕྱིན་པའི་ཚོར་བ་ཞིག་ཀྱང་དབང་མེད་དུ་སྐྱེས་བྱུང་།
དཔེ་དེབ་དང་གྱོན་ཆས་དག་གང་སར་གོ་རིམ་མེད་པའི་བཀྲམ་པའི་རང་གི་ཉལ་ཁང་དུ།
ཟ་འགྲམ་གྱི་སྐྲ་དཀར་འགའ་བཏོགས་ནས་མེ་ལོང་ཆེན་པོ་དེའི་ཟུར་ངོས་ཤིག་ལ་བཙུགས་རྗེས།
སེམས་པ་སྐྱོ་ལྷང་ལྷང་ངང་གློག་ཀླད་ཀྱི་ཁ་གཏད་དུ་འགྲེང་དུས།
གནམ་སྔོན་པོའི་གཏིང་རུམ་ནས་ལྡང་བའི་རླུང་བུ་ཞིག་དང་མཉམ་དུ།
ཉི་མ་གཅིག་རང་ཉིད་ཀྱང་རྨེག་མེད་དུ་འགྲོ་བར་བསམས་ན།
གཞི་མེད་པའི་སེམས་ཁྲལ་མང་པོ་ཞིག་མེ་ལ་བསྲེགས་འདོད་ཅིང་།
རྨང་མེད་པའི་འཆར་ཡན་གྲངས་མེད་ཅིག་ཆུ་ལ་བསྐྱུར་འདོད།
ལྕགས་རྟ་ཞོན་ནས་མཚེའི་ལྗང་ཁུ་དེའི་འགྲམ་དུ་བསྐྱོད་དུས།
སྟོན་རླུང་གིས་མཚེའུའི་ངོས་སུ་རྦ་རླབས་ཆུང་ཆུང་མང་པོ་ཞིག་ཆལ་ཆིལ་དུ་གཡོ་བཞིན་འདུག་པ་མཐོང་བས།
དོར་མ་བརླ་རྩར་བརྫེས་ཏེ་ཆུ་ནང་དུ་འགྲེངས་ནས་ཡུད་ཙམ་བསྡད་པས།
སེམས་པ་འདི་ཡངས་སངས་སེར་སོང་བ་དང་།
སྐྲ་ལོ་རེ་རེའི་རྩ་ནས་ཀྱང་དབུགས་དབྱུངས་རེ་རེ་རྡུལ་ཕྲན་ལྟར་འཐོར་སོང་།
གནའ་དུས་ནས་སྟོན་མཇུག་ཏུ་ཁྲུང་ཁྲུང་བྱང་ལ་ལོག་ཅིང་།
སྟོན་མཇུག་ཏུ་ལོ་མ་སེར་པོར་འགྱུར་བ་ལ་དཔེ་བླངས་ཏེ།
སྙན་ངག་པ་དག་གིས་མི་རྣམས་ཀྱི་དབང་འཕྲོག་པའི་སྙན་ངག་མང་པོ་ཞིག་བརྩམས་ཡོད་ཅིང་།
དབེན་དགོན་ཚོའི་གསེར་ཏོག་ཀྱང་སྟོན་མཇུག་ཏུ་ཆེས་དྭངས་པའི་གཡུ་མདོག་གི་ནམ་མཁའི་ངོས་སུ་ཟུག་འགྲོ་བ་དེ་ཡང་དྲན་ཡོང་།
Subscribe to:
Post Comments
(Atom)
0 བསམ་ཚུལ་འདོན་པ།:
Post a Comment