ལྷ་གསོལ་ཀླུ་གསོལ་ཞེས་པ་འདི་འདོར་རྐྱང་བྱེད་རྒྱུ་ཞིག་གང་ནས་ཡིན། བསྟན་པའི་སྙིང་པོ་གསང་སྔགས་ཀྱི་བདེ་གསང་འཇིགས་གསུམ་ཀྱེ་རྡོར་དུས་འཁོར་ཕུར་བ་སོགས་རྒྱུད་སྡེ་བཞིའི་ལྷ་ཡི་ཆོ་ག་གང་ཞིག་ཡིན་ཡང་དེའི་ནང་དུ་ལྷ་དང་ལྷ་མོའི་ཚོགས་ལ་མཆོད་བསྟོད་བྱེད་པའི་ཆོས་ཚན་རེ་མེད་མི་སྲིད་ཅིང་། ཕར་ཕྱིན་དྲུག་གི་ཡ་གྱལ་སྦྱིན་པའི་ཕར་ཕྱིན་ལ་མཚོན་ན་མིའི་འགྲོ་བ་གཅིག་པོར་ཟང་ཟིང་གི་སྦྱིན་པ་གཏོང་རྒྱུ་ཙམ་ཞིག་མ་ཡིན་པར་འགྲོ་བ་བཀྲེས་སྐོམ་གྱི་སྡུག་བསྔལ་མྱོང་བཞིན་པའི་གཞི་བདག་གནས་བདག་འདྲེ་སྲིན་འབྱུང་བོ་སྡེ་བརྒྱད་ཀྱི་ཚོགས་ལ་དཀར་གསུམ་མངར་གསུམ་སོགས་ཀྱིས་སྦྱིན་མཆོད་བྱེད་དགོས་ཤིང་། དེ་དག་ལྟ་བ་སྟོང་ཉིད་སྙིང་རྗེའི་རྩིས་ཟིན་ན་ཚོགས་གཉིས་རྫོགས་པའི་ལམ་ཁ་ཁྱད་དུ་འཕགས་པ་ཞིག་ཡིན་པ་རྒྱ་གར་གྱི་སངས་རྒྱས་རང་ཉིད་དང་ཨོ་རྒྱན་སངས་རྒྱས་གཉིས་པ་སོགས། བོད་དུ་མར་མི་དྭགས་གསུམ་དང་ས་སྐྱ་གོང་མ་རྣམ་ལྔ། སོ་ཟུར་གནུབས་གསུམ་དང་རྗེ་ཙོང་ཁ་པ་ཡབ་སྲས་སོགས་ཆོས་བརྒྱུད་སོ་སོའི་ཤིང་རྟའི་སྲོལ་འབྱེད་ཀྱི་སློབ་དཔོན་ཆེན་པོ་དག་གིས་གསུངས་ཡོད་ཅིང་། གོང་ས་མཆོག་གིས་ཀྱང་བོད་སྐྱོང་ལྷ་སྲུང་གི་འཕྲིན་བཅོལ་ཁྱད་དུ་འཕགས་པ། ཀྱེ། མ་རྨད་བསོད་ནམས་མཐུ་དང་སྨོན་ལམ་གྱིས། །ཞེས་སོགས་བརྩམས་གནང་མཛད་ཡོད་ཅིང་། ཁོང་གིས་ཆོས་སྲུང་གི་འཕྲིན་བཅོལ་དེ་ཚོ་འབྲི་དུས་བོད་ཀྱི་ལྷ་འདྲེ་གཞི་བདག་དེ་ཚོས་ཀྱང་བོད་མི་རིགས་ནང་བཞིན་སྡུག་བསྔལ་མྱོང་བཞིན་པའི་ཚུལ་ལ་དགོངས་ནས་སྤྱན་ཆབ་བཏོན་པ་སོགས་གསོལ་མཆོད་རེ་ཟུང་གི་མཇུག་བྱང་དུ་འཁོད་ཡོད་པས། གལ་སྲིད་གཏོར་མ་ཆ་གསུམ་དེ་རྒྱལ་བའི་བཀའ་ཡིན་པར་ཁས་ལེན་ན་ལྷ་འདྲེ་གསོལ་མཆོད་སངས་རྒྱས་ཀྱིས་བསྟན་པའི་ལམ་མིན་ཞེས་སྙིང་ཁམས་ཆེན་པོས་ཆོས་སྤོང་གི་ལས་ངན་གསོག་པར་མི་བྱེད་པར། བོད་ཀྱི་རིག་གནས་ཀྱི་གྲུབ་ཆ་ཕྲ་མོ་རེ་རེ་བཞིན་རིག་གནས་ཆེན་པོ་འདི་འགྲུབ་བྱེད་ཀྱི་རྒྱུ་ཕུན་སུམ་ཚོགས་པ་རེ་རེ་ཡིན་པའི་ངེས་ཤེས་རྙེད་པར་བྱེད་འཚལ་ལོ། །
ད་དུང་འདུལ་བའི་སྡེ་སྣོད་ཚད་ལྡན་དག་ལས་དགེ་སློང་ཚད་ལྡན་ཞིག་ཡིན་ན་ཉི་མ་རེ་རེ་བཞིན་གཏོར་མ་བརྒྱ་རྩ་འདི་ངེས་པར་དུ་གཏོང་དགོས་ཚུལ་གསུངས་ཡོད་ཅིང་། འཕགས་ཡུལ་མཁས་གྲུབ་ཀུན་གྱིས་ཚད་མར་འཛིན་པའི་རྒྱལ་སྲས་ཞི་བ་ལྷས་ཀྱང་། འཕགས་པ་སྤྱན་རས་གཟིགས་དབང་གི །ཕྱག་ནས་འབབ་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམ་བྱས་ཤིང་། །ཁྲུས་བྱས་རྟག་ཏུ་བསིལ་བར་ཤོག །ཅེས་འགྲོ་བ་ཡི་དྭགས་ཀྱི་རིགས་སུ་གྱུར་པ་མང་པོར་ཐ་ན་སེམས་ཀྱི་དམིགས་པ་ཚུན་ཆད་ཀྱིས་བདུད་རྩི་འབེབ་སྦྱངས་བྱེད་ཚུལ་གསུངས་ཡོད་ཅིང་། དགེ་ལུགས་ལ་མཚོན་ན་གུང་ཐང་བསྟན་པའི་སྒྲོན་མེས་གསུངས་པའི་ཚེ་གཅིག་ཉམས་ལེན་ལྟ་བུའི་ནང་དུ་ཐ་ན་རང་གི་བཤང་གཅི་དང་མཆིལ་སྣབས་ཚུན་ཆད་སྔགས་ཀྱི་ནུས་པའི་སྒོ་ནས་ཡི་དྭགས་ཀྱི་རིགས་ལ་སྦྱིན་ཚུལ་གསུངས་པ་དང་། སྟོན་པའི་འོག་ཏུ་ནང་པའི་སློབ་དཔོན་ཤེས་རབ་ཅན་ཞིག་ལ་འགྲན་ཟླ་མེད་པའི་མགོན་པོ་ཀླུ་སྒྲུབ་ཀྱིས་དབུ་མ་རིན་ཆེན་འཕྲེང་བ་ལས། བཤོས་གསོལ་སྔོན་དང་འོག་དག་ཏུ། །ཡི་དྭགས་ཁྱི་དང་གྲོག་སྦུར་དང་། །བྱ་ལ་སོགས་པ་ཅི་བདེ་བར། །རྟག་ཏུ་ཟས་དག་བསྩལ་པར་མཛོད། །ཅེས་གསུངས་ཡོད་པས། རང་ཉིད་ཤེས་རབ་ཅན་དུ་རློམས་ནས་རི་དང་གཙང་པོ་ཤིང་ནགས་སོགས་ལ་གནས་པའི་གཞི་བདག་འབྱུང་པོ་ཡི་དྭགས་ཀྱི་རིགས་སུ་གྱུར་པ་དག་ལ་ཟང་ཟིང་གི་སྦྱིན་པ་གཏོང་བའི་སྒོ་འགོག་པ་ནི་རང་རྒྱུད་ན་ཆོས་ཀྱི་བག་ཆགས་དང་སྙིང་རྗེ་ཏིལ་འབྲུ་ཙམ་ཡང་མེད་དོ་ཞེས་རང་རྒྱུད་གྱོང་པོ་དེ་ཕྱིར་མངོན་པ་ཙམ་ལ་གཞན་དུ་མི་སེམས་སོ། །———–
འདི་ནི་ཉེ་ཆར་ཞོགས་དུང་སྙིང་སྟོབས་ཞེས་པའི་དེབ་ཅིག་ལས་འཕྲོས་ཏེ་དྲ་གྲོགས་འགས་རིགས་པ་གསལ་མདོག་དང་ཀླད་པ་དྭངས་མདོག་གིས་བོད་ཀྱི་རིག་གཞུང་རྙིང་པ་དག་ལ་སྒོ་ཅི་རིགས་ནས་ཟུར་ཟ་བྱེད་པ་དེར་དམིགས་ནས་བྲིས་པའོ།།