ཁྱད་པར་དུ་ང་རང་དུས་ཆད་བཞིན་འཛིན་གྲྭ་གྲོལ་རྗེས་ཡིས་ལིས་ལ་ཐུག་འཕྲད་བྱེད་ དུ་འགྲོ་བའི་ལམ་ཁར་ངོ་མི་ཤེས་པའི་རྒྱ་རིགས་སྐྱེས་པ་གཉིས་ཀྱིས་ངའི་རྒྱབ་ནས་ ལྐོག་ལྟ་བྱེད་བཞིན་ཡོད་པ་དེ་མཐོང་ནས་ང་ལ་དོགས་མི་བདེ་བའི་ཚོར་བ་ཤུགས་ཆེན་ ཞིག་བསླེབས་བྱུང་ལ། ཟ་ཁང་དེར་བསླེབས་ནས་ཡིས་ལིས་ལ་འཕྲད་དུས་མོའི་གདོང་གི་རྣམ་འགྱུར་ཡང་དེ་ཙམ་ རྒྱུན་ལྡན་ཞིག་མ་རེད། ངས་སེམས་པ་ལྷོད་ལ་ཏོག་ཙམ་འབབ་ཏུ་བཅུག་རྗེས་གཡས་གཡོན་ན་ལྐོག་ཉན་བྱེད་མཁན་ བྱེད་མཁན་ཡོད་མེད་རོབ་ལྟ་ཞིག་བྱས་རྗེས། ཁ་སང་དེ་རིང་གི་གནས་ཚུལ་འདིར་བལྟས་ན་རྒྱལ་ཁབ་ཀྱི་ཆབ་སྲིད་ལ་འགྱུར་བ་ཆེན་པོ་ ཞིག་འགྲོ་ཐག་ཆོད་རེད། གཙོ་འཛིན་མའོ་ཡིས་ཁྱེད་ལ་དེའི་སྐོར་ནས་ག་རེ་བརྗོད་སོང་། ཞེས་དྲིས་པར། ཡིས་ལིས་ཀྱི་གདོང་ལ་སྐྲག་སྣང་དེ་ཙམ་མེད་པའི་ཉོབ་སྣང་ཞིག་ཤར་ནས། གཙོ་འཛིན་མའོ་ཡིས་ང་ལ་ཐད་ཀར་ཅི་ཡང་བརྗོད་མ་སོང་ཡང་། ཁོས་ངའི་ཨ་མའི་སྒྱུག་པོར་མ་རྩ་རིང་ལུགས་དང་འབྱོར་ལྡན་གྲལ་རིམ་ལ་དགག་རྒྱག་ བྱེད་རྒྱུ་ཡིན་པའི་སྐད་ཆ་དེ་འདྲ་བརྗོད་འདུག ཡིན་ན་ཡང་ང་རང་སྐྲག་ས་གཅིག་ནི་གྲལ་རིམ་འཐབ་རྩོད་ཀྱི་སྐོར་དེ་རེད། ངའི་ཨ་མའི་སྒྱུག་པོ་སྒྱུག་མོ་གཉིས་སྔོན་ཆད་ས་བདག་ཆེན་པོ་ཡིན་པས། གལ་སྲིད་གྲལ་རིམ་འཐབ་རྩོད་ཀྱི་ལས་འགུལ་དེ་འདྲ་སྤེལ་བ་ཡིན་ན་ཁོང་གཉིས་ལ་ཉེན་ ཁ་ཆེན་པོ་འཕྲད་རྒྱུ་ཐག་ཆོད་རེད། ཟེར་བས། ངས། གཙོ་འཛིན་མའོ་ནི་ཁྱེད་ཀྱི་ཨ་ཕ་ཡིན་པས་རྒྱལ་ཁབ་ཅིག་གི་དབུ་ཁྲིད་ཅིག་གིས་ཁོང་ གི་བཟའ་ཟླའི་ནང་མི་ཙམ་སྲུང་སྐྱོབ་བྱེད་ལོས་ཐུབ་ཅེས་བརྗོད་པར། མོས། ངའི་ཨ་མ་ནི་གཙོ་འཛིན་མའོ་ཡི་ཡོངས་གྲགས་མིན་པའི་ཟུར་བསྟེན་སྙིང་སྡུག་ཡིན་པས་ ཁོང་གིས་ཟུར་མོའི་སྒྱུག་པོ་བཟའ་ཚང་གཉིས་ལ་གུ་ཡངས་གཏོང་མིན་མི་ཤེས། རྒྱལ་ཁབ་ཀྱི་དོན་ཆེན་ཟེར་བ་དེ་སྒྲུབ་དུས་ནང་མི་བློས་གཏོང་བྱེད་དགོས་པ་ནི་ ཏང་གི་རྩ་བའི་སྒྲིག་གཞིའི་གྲས་རེད། ཟེར་བཞིན་སྐད་ཆ་ཡང་མུ་མཐུད་དེ་བཤད་མ་ཐུབ་པར་མགྲིན་པ་བརྣངས་ནས་བསྡད་སོང་། མུ་འགོད།