སྨྱོན་པའི་འཇིག་རྟེན།: སྟོན་གྱི་ཉིན་ཐོ། བཅུ་དྲུག

ཆུ་ཚོད་བརྒྱད་པར་གཉིད་ལས་ སད་ཀྱང་ལངས་མ་འདོད་པར་དགུ་བ་བར་དུ་ཉལ་བསྡད། མདང་དགོང་རྨི་ལམ་རབ་རིབ་ཅན་མང་ཞིང་། བྲག་རྩ་ཞིག་ན་གུ་རུ་རིན་པོ་ཆེར་གསོལ་བ་འདེབ་ཞོར་ཅིག་འཚོལ་བཞིན་འདུག ཁ་སང་དགོང་མོར་ཉིན་ཐོ་བྲིས་ཏེ་འཕྱི་བོའི་བར་དུ་བསྡད་པས་ཡིན་ནམ་གཉིད་མ་སད་ ཅིག་ལ་མིག་ལམ་དུ་བོད་ཡིག་དབུ་ཅན་མང་པོ་ཞིག་འཆར་ཡོང་གི་འདུག མིག་ལྤགས་དམ་པོར་བཙུམས་ན་ཇེ་གསལ་དུ་འགྲོ་ཡང་དམིགས་པ་གཏད་དེ་ཀློག་རྩིས་བྱས་ ན་རིམ་བཞིན་ཡལ་འགྲོ་བ་ཞིག་འདུག སྣང་ཚུལ་འདི་ནི་ཁོ་བོར་ལོ་འགའི་སྔོན་ནས་བྱུང་ཞིང་། གོང་ས་མཆོག་གིས་བརྩི་མཐོང་ཆེན་པོ་མཛད་པའི་སྔ་འགྱུར་རྙིང་མའི་བླ་མ་ཚད་ལྡན་ ཞིག་ལ་དེ་ལུགས་ཞུས་པར། མཚམས་ལ་བསྡད་དེ་ཚིག་བདུན་གསོལ་འདེབས་འབུམ་ཕྲག་གཅིག་ཟློས་དང་དེ་ནས་གཏེར་ རྟགས་ཤིག་ཡིན་ན་ཇེ་གསལ་དུ་འགྲོ་གི་རེད་གསུངས་ཀྱང་ལེ་ལོའི་དབང་གིས་ད་བར་དེ་ ལྟར་བྱེད་ཐུབ་མ་སོང་། གཅིག་བྱས་ན་ང་ཚོའི་མིག་འདིའི་ནང་དུ་པར་ཆས་ཀྱི་སྦྱིན་ཤོག་ལྟ་བུའི་རྫས་རིགས་ ཤིག་ཡོད་པའི་ངོས་སུ་མདང་དགོང་བཀླགས་པའི་ཡིག་འབྲུ་དེ་ཚོའི་ལྡོག་གཟུགས་དག་ འབྱར་བསྡད་ཡོད་པ་ཞིག་ཀྱང་ཡིན་སྲིད།

ཡར་ལངས་དུས་ཉི་འོད་སེར་ པོ་ཞིག་སྒེའུ་ཁུང་བརྒྱུད་དེ་ཉལ་ཁང་ནང་འཁྱིལ་འདུག་ཅིང་། ཁྲུས་ཁང་གི་སྒེའུ་ཁུང་ལས་ནུབ་ཕྱོགས་ཀྱི་མཁའ་དབྱིངས་སུ་ཟླ་བ་ཕྱེད་ཀ་ཞིག་ཤར་ ཡོད་པ་མཐོང་བས། ཉི་ཟླ་གཉིས་ཀ་དུས་གཅིག་ཏུ་མཐོང་བ་འདི་སྐྱིད་པོ་ཞིག་རེད་སྙམ་སྟེ་པར་ཆས་ཁུར་ ཡོང་ནས་ཟླ་བ་དེ་པར་དུ་བླངས། གློག་ཀླད་ཀྱི་ཁ་ཕྱེ་བ་ན་རྔ་བ་ནས་ཨ་ནེ་ཞིག་གིས་རང་ལུས་མེ་རུ་བསྒྲོན་པའི་གསར་ འགྱུར་མི་སྙན་པ་ཞིག་མཐོང་།
ངོ་དེབ་སྟེང་དུ་རྔ་བ་ཤེས་ རབ་དང་མཉམ་དུ་བོད་ནང་གི་དེ་རིང་གི་གནས་སྟངས་སྐོར་ཁ་བརྡ་ཏོག་ཙམ་བྱས་ཤིང་། ཏྰ་ལས་བླ་མས་མི་གཟིགས་ས་ནས། རྒྱ་ནག་གཞུང་གིས་མི་རིག་ས་ནས། །བོད་མི་རེ་རེ་མེ་རུ་འབར་ན། །བདག་གི་སྙིང་འདིས་བཟོད་ཐབས་མི་འདུག །ཅེས་འབྲི་བར་ཐལ།

ཞོགས་ཇ་ཞིག་འཐུང་བཞིན་ པའི་སྐབས་སུ་ཕོ་གསར་ཞིག་གིས་ཁོ་བོ་བཙལ་ནས་བསླེབས་སོང་། ཁོ་རང་ནི་ཨིན་རྡུ་ཉིས་ཤི་ཡའམ་བོད་སྐད་དུ་གསེར་གླིང་ཞེས་པའི་ཡུལ་དེ་ནས་ཡིན་ ཞིང་། སྔོན་ཆད་ཡེ་ཤུ་དང་ད་ལྟ་ནང་པ་ཡིན་ཟེར། ཁོའི་ཡུལ་དེར་མི་གྲངས་ཕྱེད་ཀ་ཁ་ཆེ་དང་ཕྱེད་ཀ་ཡེ་ཤུ་བ་ཡིན་པ་དང་། ནང་པ་ནི་མཆོད་རྟེན་ངོ་མཚར་ཅན་སྦ་རོ་སྦ་རྡུར་གྱི་གཡས་གཡོན་དུ་ཐར་ཐོར་རེ་ལས་ མེད་པ་དང་། ཡུལ་དེར་ནང་པའི་བསྟན་པ་ཐོག་མར་གདན་འདྲེན་མཁན་ཨ་ཏི་ཤ་རེད་ཟེར་བས། ཁོ་བོས་ཨ་ཏི་ཤའི་སྔོན་ནས་ཡུལ་དེར་ནང་བསྟན་རྒྱ་ཆེར་དར་ཡོད་པས། ཨ་ཏི་ཤ་ཇོ་བོ་གསེར་གླིང་པའི་མདུན་དུ་བྱང་ཆུབ་སེམས་ཀྱི་མན་ངག་ཞུ་རུ་ཕེབས་པ་ ཞིག་ཡིན་ལུགས་བོད་ཡིག་ཏུ་ཡོད་པའི་ཇོ་བོའི་རྣམ་ཐར་དུ་གསལ་ལུགས་བརྗོད། ཁོས་སྐྱེ་བ་སྔ་ཕྱི་སྟོན་པའི་ཚེ་རབས་ལས་རྩིས་ཤིག་རྒྱག་རོགས་ཟེར་བས། ངས་ཁོ་ལ་ཁྱེད་ཀྱི་ཡི་དམ་གང་ཡིན་དྲིས་པར་མགོན་པོ་འོད་དཔག་མེད་ཡིན་ཟེར། ད་འོ་ན་འགྲིགས་འདུག མགོན་པོ་འོད་དཔག་མེད་ཀྱིས་གང་ཟག་སུ་ཞིག་གིས་ཁོང་གི་དག་ཞིང་བདེ་བ་ཅན་དུ་ སྐྱེ་བའི་སྨོན་ལམ་རྩེ་གཅིག་ཏུ་བརྒྱབ་ན་དེ་འགྲུབ་པའི་ཞལ་བཞེས་ཡོད་པས། ཁྱེད་ལ་ཚེ་རབས་ལས་རྩིས་དགོས་ཀྱི་མི་འདུག གལ་སྲིད་ཁྱེད་ལ་མགོན་པོ་འོད་དཔག་མེད་ལ་འགྱུར་བ་མེད་པའི་དད་པ་ཞིག་ཡོད་ན། ཁྱེད་རང་སྐྱེ་བ་རྗེས་མར་ནུབ་ཕྱོགས་བདེ་བ་ཅན་དུ་སྐྱེ་ཐུབ་ཀི་རེད་ལབ་པས་དགའ་ སོང་། ཡང་ཁོས་ཁོ་རང་བུ་མོ་ལ་ཞེ་དྲགས་དགའ་གི་འདུག་པས་དེས་ཆོས་སྒྲུབ་པ་ལ་བར་ཆད་ བྱེད་དམ་ཟེར་བས། གང་ཡང་བྱེད་ཀི་མ་རེད། བུ་མོར་ཕར་དགའ་ཚུར་དགའ་བྱོས། ཡིན་ཡང་བུ་མོ་མི་རྟག་པ་ཡིན་སོམས་དང་དེས་འགྲིག་གི་རེད་ལབ།
ཉིག་ཡོར་ནས་གློག་འཕྲིན་ ཞིག་བསླེབས་པའི་ནང་རྒྱལ་སྤྱིའི་བོད་ཀྱི་སྐད་ཡིག་ཚོགས་འདུ་ཐེངས་གསུམ་པའི་ སྟེང་དུ་ཆེད་རྩོམ་སྒྲོག་སྦྱང་བྱེད་མཁན་ཚང་མ་གཏན་ཁེལ་ཟིན་པས་ཁྱོད་རང་ཟུར་ ཞུགས་པའི་ཚུལ་དུ་མགྲོན་འབོད་བྱེད་ཀི་ཡིན་ཞེས་བྲིས་འདུག ཚོགས་འདུ་འདི་ནི་ཨ་རིའི་ཞང་ཞུང་རིག་གཞུང་ཁང་དང་བོད་ཀྱི་གསུང་རབ་དཔེ་སྐྲུན་ ཁང་། ལ་རྩེ་དཔེ་མཛོད་དང་ཁོ་ལིམ་སྦིས་ཡ་མཐོ་སློབ་བཞི་མཉམ་འབྲེལ་གྱིས་བཀོད་སྒྲིག་ བྱེད་བཞིན་པ་ཞིག་རེད།

དེ་ནས་ལྕགས་རྟར་ཞོན་ཏེ་ མཚོ་ལྗང་ཁུའི་འགྲམ་ལ་སོང་བ་ན་གྲོགས་པོ་ཇེ་ཧྥུར་ཐུག་སོང་བས་ཁོ་ལ་འདྲ་པར་འགའ་ རྒྱག་ཏུ་བཅུག་ཅིང་། དེ་ནས་ཕར་ཙམ་སོང་བ་ན་ཨ་མདོ་ནས་ཡིན་པའི་ཨ་ཁུ་དཀོན་མཆོག་ཀྱང་མཚོ་སྐོར་ལ་འགྲོ་ བཞིན་པར་འཕྲད། མཚོ་མཐའི་ཤིང་གི་རྐུབ་སྟེགས་ཤིག་གི་སྟེང་ནས་གདོང་ཉི་མར་འཁོར་ནས་ཡུད་ཙམ་རིང་ སྡོད་སྐབས། མིག་གི་ལྟ་ཕྱོགས་ཤིག་གིས་རྐང་པའི་མདུན་དེར་ས་འབུ་ཐག་ནར་ཞིག་ག་ལེར་སའི་འོག་ནས་ཕྱིར་ཐོན་ཏེ་མགོ་ཉུག་ཉུག་གིས་ཡར་མར་ལན་མང་ཉུལ་རྗེས་རྩྭ་ལོ་ལྗང་ཁུ་དེ་ཚོའི་གསེབ་ཏུ་འཛུལ་སོང་། ཁོའི་གཟུགས་པོ་དེར་ཁབ་ཅིག་གི་ཆེ་ཆུང་ལས་མེད་ཀྱང་རྣམ་ཤེས་ཞེས་པའི་བདེ་སྡུག་གི་ཚོར་བ་མྱོང་མཁན་དེ་ཡོད་པས། རང་ཉིད་དང་འདྲ་བའི་འདུ་ཤེས་ཤིག་སྐྱེས་ཏེ་སངས་རྒྱས་ཀྱི་གཟུངས་སྔགས་འགའ་བཏོན་ནས་ཁོ་གཟུགས་པོ་ཆུང་ཆུང་དེའི་སྟེང་དུ་ཕུ་འགའ་བཏབ། དེ་རྗེས་ཕྱིར་ནང་དུ་ལོག་སྟེ་སྔོ་ཚོད་དང་གླང་ཤ་འདྲེས་མའི་ཐུག་པ་ཧ་ཅང་ཆེན་ པོ་ཞིག་གི་གང་སྐོལ་བཞིན་པའི་སྐབས་དེར། ཨ་མདོའི་གསར་བུ་གཉིས་དང་གསར་མོ་ཞིག་གི་ཁ་པར་ཡོང་ནས་མོ་མོ་བཟོ་གི་ཡིན་པས་ ཡོང་རོགས་ཟེར། དེ་ཚོར་སྒུག་བཞིན་ཆུ་ཚོད་གསུམ་ཙམ་ལ་བསྡད་མཐར་བསླེབས་སོང་། ཕོ་གསར་འདི་ནི་ཨ་མདོ་རྒན་གྱའི་ཡིན་ཞིང་ཉེ་ཆར་འདི་གར་གནས་སྤར་བྱས་པ་ཞིག་ཡིན། ཁོའི་ནང་དུ་རྒན་གྱའི་བྲག་དཀར་དགོན་པའི་དུས་དེབ་”གངས་རིའི་བཀྲག་མདངས་”ཞེས་པ་ཞིག་ལས་རང་གི་ཕུ་བོ་ལྡོང་ཕྲུག་གིས་བྲིས་པའི་”བདག་གི་དཔེ་ཀློག་ལམ་བུ་”ཞེས་ པ་ཞིག་འདུག་པ་ཕྲན་ཙམ་བཀླགས། དེབ་དེའི་ཁ་ཤོག་གི་ནང་དུ་གུང་རུ་མཁའ་འགྲོ་མ་སྐལ་བཟང་དམ་ཆོས་སྒྲོལ་མའི་འདྲ་ པར་ཡིད་དབང་འཕྲོག་པ་དེ་འདྲ་ཞིག་ཀྱང་འདུག དེ་ནས་ངེད་ཅག་གིས་ཀུན་དོང་དང་ཤ་བསྲེས་མའི་མོ་མོ་ཞིམ་པོ་ཞིག་བཟའ་ཞོར་ཁ་བརྡ་ བྱས། ཕོ་གསར་གཞན་པ་དེ་ཉིན་མཚན་གསུམ་ལ་ལས་ཀ་བྱས་ནས་གཉིད་མ་ཁུག་ཀྱང་དེ་ཙམ་ཐང་ཆད་ པའི་སྣང་བ་མི་འདུག

ཟིན་བྲིས་ཀྱི་སྡེ་ཚན

ཚོལ་གཤེར

དྲ་ངོས་བཀླགས་གྲངས།

བཀླགས་གྲངས་མང་ཤོས

ཡིག་ཚགས

རྟག་བརྟན་གྱི་སྙན་ཚིག

About Me

སྟོན་གྱི་ཉིན་ཐོ། བཅུ་དྲུག

0 བསམ་ཚུལ་འདོན་པ།:

Post a Comment