སྨྱོན་པའི་འཇིག་རྟེན།: སྟོན་གྱི་ཉིན་ཐོ། སུམ་ཅུ།

མདང་དགོང་རྨི་ལམ་ཧ་ཅང་ མང་། བླ་མ་ཞིག་གི་ཞབས་ཞུ་བྱེད་བཞིན་འདུག སྨན་པ་ཞིག་གི་གཡོག་པོ་བྱེད་བཞིན་འདུག གསར་འབྱོར་ཞིག་གི་སྐད་སྒྱུར་བྱེད་བཞིན་འདུག ཆུ་ཚོད་བདུན་པར་གཉིད་ལས་སད་དུས་མལ་ཁང་ཧ་ཅང་འཁྱགས། ཉི་འོད་ལང་ལོང་ཞིག་འཕྲོས་ཡོད་ཀྱང་དྲོད་རྟ་རྔ་ཙམ་ཡང་མི་འདུག
མཆོད་འབུལ་ཁ་འདོན་སོགས་ རྒྱུན་ལུགས་བཞིན་བྱེད་ཞོར་གློག་ཀླད་ཉུལ། མི་རེ་ཟུང་གིས་དོ་རྒྱ་བསོད་རྡོར་གྱི་དངོས་བྲིས་རྩོམ་ཡིག་དེ་བཀླགས་ནས་མིག་ ཆུ་ཤོར་སོང་ཞེས་བྲིས་འདུག་ལ། རང་ཉིད་ལ་ཡང་སྐྱོ་གདུང་གི་ཚོར་བ་དྲག་པོ་མཆི་མ་འཁྲུག་པ་ཞིག་བྱུང་ཞེས་ཁ་སང་ གི་ཉིན་ཐོའི་ནང་དུ་བྲིས་ཡོད། མི་རིགས་ཀྱི་བླ་སྲོག་ཉམས་དུས་མི་རིགས་ཀྱི་སེམས་རྩ་ཇེ་སྙི་ཡིན་སྲིད།

ཐབ་ཚང་དུ་ཨ་རི་བ་པར་པ་ མཁས་ཅན་ཞིག་གིས་བོད་ཀྱི་སྟོད་མངའ་རིས་དང་སྨད་རྒྱ་རོང་བར་དུ་ཡུལ་སྐོར་གྱིས་ འདྲ་པར་བླངས་པའི་དེབ་ཅིག་བཞག་འདུག་པའི་ཁྲོད་དུ་ཆོལ་ཁ་གསུམ་གྱི་བོད་མིའི་ བཞིན་རིས་དང་འཛུམ་མདངས། གྱོན་ཆས་དང་མིག་འོད་སོགས་འདུག་ལ། ཁོ་བོའི་ཕ་ཡུལ་དུ་རྒྱ་གཞུང་གིས་སྦྲང་ཚང་ལྟ་བུའི་ཁང་མིག་ཆུང་ཆུང་བརྒྱ་ཕྲག་ མང་པོ་བཟོ་སྐྲུན་གྱིས་འབྲོག་པ་ཚོ་སྐྱེ་ཁམས་ཁོར་ཡུག་སྲུང་སྐྱོབ་ཅེས་པའི་མིང་ བྱང་སྙན་མོ་ཞིག་གིས་བཏུམས་ནས་དེར་བཟང་བཙོན་ལ་བཞག་དང་འཇོག་བཞིན་པའི་འདྲ་པར་ ཞེ་རྩ་མེར་ཞིང་ཡིད་དབང་འཕྲོག་པ་ཞིག་ཀྱང་འདུག
སོག་པོ་བཟའ་ཟླ་གཉིས་ཡོང་ སྟེ་ཁྱོ་ག་དེའི་ཕ་རྒན་གྲོངས་ནས་ལོ་གཅིག་འཁོར་བའི་དགེ་རྩ་ཡིན་ཟེར་བཞིན་སྤོས་ སྒམ་འགའ་དང་འབར་ཞུན་སྒམ་ཆུང་འགའ་ཕུལ་སོང་། སོག་པོའི་ལུགས་སྲོལ་ལ་མི་ཤི་རྗེས་ཕོར་པ་དང་འབར་ཞུན། ཇ་དང་ཚྭ་སོགས་གསོན་པོའི་གནས་སྐབས་སུ་བེད་སྤྱོད་བྱེད་པའི་ཅ་ལག་གི་མཚོན་བྱེད་ རེ་དགོན་པར་འཁྱེར་ཡོང་བ་ཞིག་འདུག ལྕམ་ཁ་ཐི་ལིན་དང་མཉམ་དུ་དབྱིན་དེབ་དེ་མུ་མཐུད་ནས་བཀླགས།
སློབ་ཕྲུག་ཚེ་འཛོམས་ཀྱིས་ མོའི་ནང་སྦྱོང་སྟེ་ཕ་རྒན་དང་མཉམ་དུ་ཆུ་ཚོད་གཅིག་ཙམ་ལ་བོད་སྐད་ཀྱིས་སྐད་ཆ་ བཤད་པ་སྒྲ་འཇུག་བྱས་པ་དེ་ཁྱེར་ནས་བསླེབས་སོང་བས་དེ་ཆ་ཚང་ལ་ཉན། ཕ་རྒན་རིག་འཛིན་ཅུང་ཉོབ་ཀི་ཡོད་པའི་བཟོ་ལྟ་ཞིག་ལྷང་ལ་བུད་ཡོང་བ་དང་། བུ་མོའི་སེམས་ཤུགས་ཆུང་ཆུང་དེ་ཡང་ངོས་ཟིན་ཐོབ། ཕྱི་རྒྱལ་དུ་ཡོད་པའི་བོད་པའི་དགེ་རྒན་ཚོས་ཕ་མ་ཕྲུ་གུ་དང་མཉམ་དུ་བོད་སྐད་མི་ བཤད་པའི་རིགས་ལ་བོད་སྐད་ཁ་བརྡ་སྒྲ་འཇུག་གི་ནང་སྦྱོང་འདི་སྤྲད་ན་དགེ་མཚན་ཆེ་ བར་མཐོང་སོང་། འཛིན་གྲྭ་དེ་གྲོལ་རྗེས་ཚེ་འཛོམས་ཁྲིད་ནས་ཉེ་འགྲམ་མེག་སི་ཁོའི་ཟ་ཁང་དུ་སོང་ ནས་ཟ་མ་ཞིག་ཉོས་རྗེས་མོའི་ཕ་རྒན་གྱི་ཚོང་ཁང་དུ་སོང་ནས་ཟོས་པ་དང་། དེ་རྗེས་མོ་ནང་དུ་བསྐྱལ་རྗེས་ཕྱིར་ལོག་པའི་ལམ་ཁར་ཚོང་ཁང་ཞིག་ཏུ་སོང་སྟེ་ སྒོར་མོ་གཅིག་གིས་ཨ་སྒོར་ས་ཡ་ཉིས་བརྒྱ་ལྔ་བཅུའི་རྒྱན་ཤོག་ཅིག་ཉོས། ནང་དུ་བསླེབས་ནས་གློག་ཀླད་ཀྱི་ཁ་ཕྱེས་ནས་མའོ་ཡི་མི་ཚེའི་ལོ་རྒྱུས་ཤིག་དང་ མར་ཡན་ལོ་ཐོ་*དང་ གསང་བའི་ཐིག་རིས་གཉིས་ཞིབ་བསྡུར་གྱིས་ཉིས་སྟོང་བཅུ་གཉིས་ལོ་དེ་འཛམ་གླིང་གི་ མཐའ་མཇུག་ཡིན་མིན་སྐོར་གྱི་དངོས་བཤུས་གློག་བརྙན་ཞིག་ལ་བལྟས།

ཡང་བརྙན་འཕྲིན་ལས་སྲོག་ ཆགས་ཀྱི་འཇིག་རྟེན་དུ་སེམས་ཅན་མི་འདྲ་བས་འཚོ་ཐབས་མི་འདྲ་བ་དུ་མ་བརྒྱུད་ སྤེལ་བྱེད་ཚུལ་ལ་བལྟས། དེ་ཡང་བྱ་རིགས་ཤིག་གིས་རང་གི་ཚང་བཟོ་དུས་རྩྭ་རྒྱུས་ཕྲ་མོ་དག་མཆུ་བར་དུ་ བཟུང་ནས་ང་ཚོས་ཚེམས་པོ་རྒྱག་པ་དང་གཅིག་མཚུངས་ཀྱི་ཚེམས་བཟོ་བྱེད་བཞིན་འདུག་ པ་དང་། སྦེ་ཝེ་ཟེར་བའི་སྲམ་ལྟ་བུའི་སྲོག་ཆགས་ཨ་ལ་སི་ཀའི་མཚེའུ་ལ་གནས་པ་ཞིག་གིས་ ལྗོན་ཤིང་དག་སོ་ཡིས་འཆོས་ཏེ་དུམ་བུར་གཏུབས་ནས་དྲོ་སྐྱིད་ལྡན་པའི་ཚང་བཟོ་བ་ སོགས་ལ་བལྟས། ཡང་ཚན་རིག་པ་དུ་མས་དཔེ་རིས་དང་བཅས་པའི་སྒོ་ནས་བར་སྣང་དང་འཐེན་ཤུགས་ཀྱི་ སྐོར་ངོ་སྤྲོད་བྱས་པ་དེར་བལྟས། ཡོད་ཚད་བར་སྣང་ཡིན་པ་དང་ཡོད་ཚད་བདེན་པར་མ་གྲུབ་པ་གཉིས་ཀྱི་བར་དུ་འབྲེལ་བ་ག་ རེ་ཡོད་དམ། ད་དུང་ཉུ་ཁྲན་གྱི་འཐེན་ཤུགས་དང་ཨ་ཡན་ས་ཐན་གྱི་དུས་ཚོད་དང་བར་སྣང་གི་འབྲེལ་ བའི་སྐོར་ཞིག་ཀྱང་ངོ་སྤྲོད་བྱས་སོང་ཡང་རང་ཉིད་ཀྱི་དབྱིན་སྐད་སྐྱོ་བས་ཚང་མ་ གོ་མ་སོང་། ད་དུང་ཀུ་ཤུ་གློག་གླད་གསར་བཏོད་པ་སི་ཁྲི་ཝིན་གྱི་མི་ཚེ་དང་གསར་བཏོད་ཀྱི་ སྐོར་དངོས་བཤུས་གློག་བརྙན་ཞིག་ལ་ཡང་བལྟས། ཉིན་གང་གནམ་ངོ་རུབ་ཅིང་ཕྱི་དྲོའི་ཆུ་ཚོད་བདུན་པ་ཙམ་ནས་ཆར་བ་ཆེན་པོ་ཞིག་བབས་ སོང་།
*པར་གཉིས་པ་དེ་ནི་མར་ཡན་གྱི་ལོ་ཐོ་ལས་བསྟན་པའི་ཁོ་ཚོའི་རྟགས་རིས་ཡི་གེ་དང་འཆི་བ་མཚོན་པའི་ཀེང་རུས་རེད།

ཟིན་བྲིས་ཀྱི་སྡེ་ཚན

ཚོལ་གཤེར

དྲ་ངོས་བཀླགས་གྲངས།

བཀླགས་གྲངས་མང་ཤོས

ཡིག་ཚགས

རྟག་བརྟན་གྱི་སྙན་ཚིག

About Me

སྟོན་གྱི་ཉིན་ཐོ། སུམ་ཅུ།

0 བསམ་ཚུལ་འདོན་པ།:

Post a Comment